Policia e Dibrës njoftoi sot se arrestoi Dritan Selishtën, personin e shpallur në kërkim pasi dhunoi fizikisht administratorin e njësisë administrative Tomin të Dibrës, Nuri Meda, mbrëmjen e së enjtes, 8 shtator.
Shërbimet e Policisë Dibër, mbi bazën e informacioneve të marra në rrugë operative për vendndodhjen e shtetasit të shpallur në kërkim policor Dritan Selishta, kanë organizuar menjëherë punën për kapjen e tij.
Rreth orës 13:00, të ditës së sotme, në fshatin Brezhdan, njësia Administrative Tomin, në afërsi të banesës së tij, shërbimet e policisë kanë bërë kapjen e shtetasit të shpallur në kërkim policor, Dritan Selishta 34 vjeç, banues në fshatin Brezhdan, Dibër, person me preçedent të mëparshëm kriminal.
Ky shtetas ishte i shpallur në kërkim policor si autor i dyshuar i ngjarjes së ndodhur me datë 08.09.2016, në fshatin Pilaf, njësia Administrative Tomin.
Selishta dyshohet se ka goditur me grushte dhe sende të forta Administratorin e njësisë Administrative Tomin, shtetasin Nuri Meda, 58 vjeç.
Shërbimet e policisë kanë bërë shoqërimin në ambientet e policisë Dibër të shtetasit Dritan Selishta, ku në bashkëpunim me Prokurorinë do të kryejnë veprimet e mëtejshme në lidhje me këtë ngjarje.
