Policia italiane ka arrestuar një shqiptar si dhe ka shoqëruar në reajon të fejuarën shtatëzënë dhe nënën e tij pasi në makinën ku udhëtonin janë gjendur 500 gramë kokainë.
Kur policia italiane nisi t’i pyesë për motivin e udhëtimit, tre shqiptarët në makinën “Hyundai Atos“ ngjyrë gri, nuk ishin shumë të qartë. E fejuara e drejtuesit të mjetit madje ishte shtatzënë dhe kur iu përgjigj policëve, ishte shumë nervoze.
Kjo shtoi dyshimet e policisë së Modenës që kishin ngritur patrulla në autostradën, ku udhëtonin tre shqiptarët. Mediat italiane shkruajnë se në mjet u gjetën 500 gram kokainë. Ideja e korrierit të drogës për të shmangur dyshimet e policisë duke marrë më vete nënën dhe të fejuarën, i kushtoi shtrenjtë.
Detajet nuk ishin menduar mirë dhe i hodhën poshtë planin që do t’i kushtojë shtrenjtë të gjithë familjes. Natën e së premtes, të tre e kaluan në qelitë e burgut.
