Në 24 orët e fundit Greqia është përfshirë nga mot ii keq i cili përveç dëmeve materiale ka shkaktuar dhe viktima.
Një grua invalide ka humbur jetën në një fshat të Mesinisë, në Peloponez, nga përmbytjet e shkaktuara prej reshjeve të dendura të shiut.
Edhe në Kalamata, ku në shumicën e shtëpive është ndërprerë furnizimi me energji elektrike, dy të moshuar janë gjetur të vdekur në shtëpitë e tyre si pasojë e përmbytjeve, ndërsa një person tjetër është shpallur në kërkim. Në mbi 200 shtëpi është nevojitur ndërhyrja e zjarrfikësve dhe organet vendore pritet të shpallin gjendjen e jashtëzakonshme për këtë prefekturë.
Sipas policisë, në disa vende është ndërprerë edhe qarkullimi i makinave, pasi është përmbytur rruga nacionale që lidh gadishullin me Athinën.
Në Selanik, shërbimi zjarrfikës ka pranuar mbi 150 thirrje urgjente nga banorë, të cilëve u janë përmbytur shtëpitë, ndërsa në lagjen periferike të “Agjias Triadhas” zjarrfikësit kanë shpëtuar mbi 24 persona, automjetet e të cilëve janë bllokuar nga niveli i lartë i ujërave.
Reshje të shumta të shoqëruara me erëra të fuqishme dhe me breshër, duke shkatërruar shumë kultura bujqësore, janë regjistruar edhe në shumë zona të Thesprotisë, sidomos në vendet turistike në Sivota dhe Parga, por edhe në ishujt e detit Jon në Korfuz, Zakintho dhe Kefaloni.
Sipas meteorologëve, moti i keq do të vazhdojë edhe në orët e ardhshme dhe do të përmirësohet vetëm të enjten në mbrëmje.
