Pranimi i Kosovës në familjen evropiane dhe botërore të futbollit, UEFA dhe më pas në FIFA, janë ndër të arritjet më të mëdha historike për Kosovën.
Për nder të anëtarësimit të Kosovës në FIFA dhe UEFA, Posta e Kosovës ka nxjerrë në qarkullim dy pulla postare me vlerë nominale €2.10, €1.30 si dhe Zarfin e Ditës së Parë.
Sipas njoftimit për shtyp të Postës së Kosovës, emetimi i pullave bëhet në prag të ndeshjes së parë të përfaqësueses së Kosovës në kuadër të kualifikimeve për Kampionatin Botëror të Futbollit.
Pamja e pullave postare dhe emetimi janë realizuar në bashkëpunim të ngushtë me Federatën e Futbollit të Kosovë (FFK).
Talentet e shumtë të Kosovës në futboll do të na bëjnë të ndihemi krenar me sukseset e tyre në fushën e gjelbër.
Futbolli është ndër sportet kryesore që ndikon në përmirësimin e imazhit dhe reputacionit të Republikës së Kosovës.
Filatelia e Postës së Kosovës edhe në të ardhmen do të nderojë dhe promovojë arritjet në sportin kosovar.
