Kanabisi ka mbuluar vendin e sidomos në zonat malore, por askujt nuk i ka shkuar në mendje që edhe shume pranë Tiranës, në sytë e ndërkombëtarëve mund të kishte hashash. Partia Demokratike ka publikuar sot pamjet e arave me kanabis në Rinas.
E nisur nga faktet, kreu i Departamentit të Rendit dhe Sigurisë në PD, Enkelejd Alibeaj i ka quajtur shfaqje daljet e kryeministrit Edi Rama dhe ministrit të Brendshëm Saimir Tahiri.
“Edi Rama e ka nisur Tahirin e tij në ca shfaqje qesharake me të cilat po talllet i madh e i vogël, nëpër disa kodra ku gjoja bëhet nami ndaj drogës. Kanë marrë pjesë në këto shfaqje edhe gazetarë dhe deputetë të rilindjes. Cdokush e di se këto aksione janë sa për shfaqje, janë selektive dhe prekin vetëm ata që nuk e kanë paguar haracin 30 përqind. Ja pse.
Kemi këtu foto, dhe pamje filmike të të paktën 6 hektarëve me kanabis, në zemër të vendit, në Larushkë, 2 kilometra larg aeroportit të Rinasit. Video në ekran gjithashtu tregon afërsinë me pistën e Rinasit, nga ku ngrihen avionët”, deklaroi Alibeaj.
Ai tha se janë të paktën 50 mijë rrënjë, të mbjella nga krahu i djathtë i kryetarit të Bashkisë Krujë, partner dhe sponsorizues i tij, me inicialet, F.D.
“Shtëpia që duket ngjitur, është e një punonjësi të policisë, shërbëtor i kryetarit të Bashkisë, Bushi, me inicialet K.L. Dhe shefi operatoriv i zonës, e ka banesën e tij 1 km larg këtij plantacioni me drogë. Kjo drogë mbillet, kultivohet me sistem vaditje të sofistikuar, ruhet nga punonjësit e shtetit, dhe mkiqyret drejtpërdrejt nga kryetari i Ramës në Bashkinë e Krujës, Bushi i famshëm i proceduar nga policia italiane për trafik lëndësh narkotike. Këto foto dhe pamje janë marrë dy ditë më parë”, theksoi Alibeaj.
Sipas tij, si ky hambar droge ka me qindra në gjithë vendin, sepse zotërohen nga të paprekshmit, nga miqtë e Edi Ramës, nga bandat e lidhura me të.
“Ky është sundimi i vendit me drogë e trafikantë. Shqiptarët duhet të ngrihen e të bashkohen kundër këtij regjimi krimi e droge. Shqipëria meriton punë të ndershme, rend e siguri. Shqipëria më mirë pa Edi Ramën”, përfundoi Alibeaj.
