Barazim pa gola në debutimin e Kombëtares në Loro Boricin e ri. Kuqezinjtë e De Biasit u ndanë me rrjeta të paprekura me një skuadër të fortë si Maroku, në një ndeshje të kontrolluar mirë nga Shqipëria që gjithsesi i mungoi finalizimi ndërsa u pa qartë dhe kujdesi për të menaxhuar energjitë para ndeshjes së 5 Shtatorit me Maqedoninë.
De Biasi e niste me formacion sulmues në të parën ndeshje në Loro Borici, Cikalleshi dhe Gashi njëkohësisht në fushë, në krahët e Mavrajt shiriti i kapitenit me Agollin që e niste nga stoli, përkrah tij Gjimshiti në vend të Lorik Canës në qendër të mbrojtjes, titullar Jahmir Hyka në rikthimin e tij pas dy vjetësh në kombëtare , i duhen vetëm 3 minuta për t’u vënë në dukje një goditje nga distanca që përfundon jashtë. Në të 7 provon edhe Gashi por me të njëjtin rezultat. Shqipëria merr shpejt frenat e lojës me një qarkullim të mirë të topit. Në Shkodër tifozët nuk kanë harruar trajtimin e vecantë për djemtë e shtëpisë me Salihin që është figurativisht aty në banderolat e tifozëve, ashtu si dhe Elsid Hysaj por Maroku shënon në të 19, edhe pse është një gol që anullohet me të drejtë nga arbitri pasi Aziz Bouhaduz bën qartësisht faull ndaj Gjimshitit para se të godasë topin.
Afrikanët provojnë në të 24 me Tanine, por është një goditje pa problem për Berishën. Menjëherë më pas Shqipëria ndërton një rast të pastër goli me Elseid Hysajn që jep një krosim perfekt në qendër të zonës por goditja e Cikalleshit me kokë është jashtë. Nuk mungojnë këshillat e De Biasit, shumë aktiv në stol, për dy sulmuesit. Në të 40 provon me një goditje nga të tijat dhe Taulant Xhaka por megjithëse me vështirësi arrin të neutralizojë portieri i Marokut. Mbyllet pa gola një pjesë e parë e mirë për Shqipërinë dhe e dyta fillon sërish me inisiativën në krahun e kuqezinjve, në të 49 Sokol Cikalleshi që futet në zonë për të lëshuar një silurë drejt portës por bën mrekullinë portieri i Marokut El Kajoui. De Biasi pas një ore lojë ndërron gjysmën e skuadrës duke nxjerrë nga fusha Lenjanin, Abrashin , Hykën, Gashin dhe Xhakën për t’i bërë vend Veselit, Kukelit, Memushajt, Sadikut dhe Agollit.
Në minutyën e 71 në fushë dhe Kace për Bashën, me Marokun që kërkon më tepër për të dalë përpara, por gjithsesi pa ndonjë problem serioz. Në të 83 veprim i bukur i Cikalleshit që gjuan në rrotullim e sipër por topi shkon jashtë portës së miqve. Maroku reagon me një goditje nga distanca të Rherras ndërsa në të 89 Mavraj mund të kishte përfituar më tepër nga naiviteti i portierit maroken, dhe përfundon me rrjeta të paprekura një provë e mirë në kompleks për Shqipërinë që forcën e vërtetë do t’i duhet ta tregojë pas pak ditësh, kundër Maqedonisë , në të njëjtin stadium.
