Policia e Durrësit ka sekuestruar 111 kg lëndë narkotike e dyshuar Cannabis Sattiva në port si dhe ka arrestuar në flagrancë një 27-vjecar që po i transportonte.
Sipas të dhënave zyrtare, droga ishte e ndarë në 66 pako dhe ishte fshehur në karrocerinë e një makine që drejtohej nga Artur Gjergji, 27 vjeç , banues në Durrës.
“Më datë 29.08.2016, rreth orës 20:00, në PKK Port, Shërbimet e Policisë Kufitare në bashkëpunim me Sektorin kundër Narkotikëve pas kontrollit në Skaner të automjetit tip “Renault”, me targë AA241ND, ku u dallua një send i dyshimtë, e kanë kaluar këtë automjet për kontroll të imtësishëm në vijën e dytë. Nga kontrolli i imtësishëm i kryer në vijën e dytë në krye të karrocerisë në brendësi të saj u gjetën të fshehura 66 pako të mbështjella me natriban, gjithsej 111 kilogramë lëndë narkotike e dyshuar Cannabis Sativa”, informon policia e Durrësit.
Materialet proceduriale i kaluan Prokurorisë së Krimeve të Rënda për veprën penale “Trafikimi i narkotikëve”.
