Trajneri i ri i Italisë, Gianpiero Ventura publikoi listën me 26 futbollistë, për miqësoren me Francën, ku do të debutojë në krye të stolit të “axurrëve” dhe për ndeshjen e parë kualifikuese të Botërorit 2018 ndaj Izraelit.
Në skuadrën e tij, tekniku përfshiu 15 lojtarë të cilët ishin të angazhuar me përfaqësuesen italiane në Kampionatin Europian, ndërsa bie në sy prezenca në skuadër e katër lojtarëve të rinj. Bëhet fjalë për Gianluigi Donnarumma-n dhe Alessio Romagnoli-n të Milanit, Andrea Belotti i Torinos dhe Leonardo Pavoletti i Genoa-s, me këtë të fundit që ishte pjesë e grumbullimit përpara Euro 2016.
Më i veçanti është padyshim rasti i Donnarumma-s. Me moshën 17 vjeç e 6 muaj, portieri i Milanit shndërrohet në lojtarin më të ri të grumbulluar në përfaqësuesen italiane gjatë 105 viteve të fundit. Më i riu në histori mbetet Rodolfo Gavinelli, që në vitin 1910 mori ftesën te “axurrët” edhe pse ishte vetëm 16 vjeç e 3 muaj.
Në skuadër kthehen edhe Marco Verratti, që mungonte prej sfidës së fundit kualifikuese të Europianit me Norvegjinë, më 13 Tetor 2015, por edhe Manolo Gabbiadini dhe Luca Antonelli. Italia do të nisë grumbullimin në Coverciano mbrëmjen e kësaj të diele, menjëherë pasi të mbyllet java e dytë e kampionatit në Serinë A.
Të mërkurën skuadra do të udhëtojë drejt Barit, për miqësoren e 1 Shtatorit ndaj Francës, ndërsa më 5 Shtator Italia debuton në Grupin G të Botërorit Rusi 2018 në fushën e Izraelit. Pjesë e këtij grupi është edhe Kombëtarja shqiptare, që e nis fushatën kualifikuese në të njëjtën datë, me sfidën në Loro Boriçi përballë Maqedonisë.
