Do të jenë 5 futbollistët me origjinë shqiptare në rradhët e përfaqësues maqedonase të cilët do të sfidojnë Shqipërinë në datën 5 Shtator në ndeshjen e parë kualifikuese për grupin G të Botërorit Rusi 2018, që do të zhvillohet në stadiumin Loro Borici të Shkodrës.
Trajneri i Maqedonisë Igor Angelovski, ka bërë publike listën e 18 futbollistëve të grumbulluar për duelin ndaj kuqezinjëve të Gianni De Biasit. 5 shqipëtarët nga Maqedonia të grumbulluar nga trajneri 40-vjecar janë Ferhan Hasani dhe Besart Ibrahimi të Shkëndijës së Tetovës, Agim Ibraimi i cili aktualisht luan me skuadrën e Astanas në Kazakistan si dhe Leonard Zhuta e Ezgjan Alioski. Forma e mirë që kanë shfaqur Ferhan Hasani dhe Besart Ibraimi me kuqezinjtë tetovarë në Europa League ka bërë që trajneri Angeloskvi ti grumbullojë ata në përfaqësuesen maqedonase.
Përsa i përket Agim Ibraimit, mesfushori me tipare sulmuese është një nga lojtarët me me shumë përvojë që ka në dispozicion Maqedonia, në 39 ndeshje me përfaqësuesen ai ka arritur të realizojë 7 gola. Nga Shkëndija e Tetovës përvec Hasanit dhe sulmuesit Besart Ibraimi, trajneri Angelovski ka grumbulluar edhe portierin Kostadin Zahov i cili ka bërë paraqitje fantastike me skuadrën shqiptare në Europa League. Një njohje e vjetër e kampionatit shqiptar që do të jetë pjesë e Maqedonisë për sfidën ndaj kombëtares kuqezi është edhe mbrojtësi Kire Ristevski. Ish lojtari i Elbasanit, Bylis-it dhe Tiranës aktualisht luan me Ujpestin në Hungari dhe është një ndër 18 emrat e përfshirë në listë. Edhe ndaj Shqipërisë, Maqedonia do të mbështet te kapiteni Goran Pandev.
