Policia e Lezhës ka arrestuar 27-vjeçarin që u shfaq në një video të publikuar në rrjetet sociale, teksa u përplas me grushte me një efektiv policie në Shëngjin.
Sipas policisë Blerti Kola, 27 vjeç, në bashkëpunim me vëllain e tij të shpallur në kërkim, Daniel Kola, 30 vjeç, kanë qëlluar me grushte efektivin e policisë A.B dhe nuk i janë bindur urdhrit të tij për të ndaluar automjetin.
Në deklaratën e policisë theksohet se Drejtoria e Standarteve Profesionale në Drejtorinë e Policisë së Shtetit, ka nisur menjëherë edhe verifikimet për veprimet e punonjësit të policisë rrugore, si dhe po bëhet këqyrja e kamerave të ambienteve përreth për të siguruar videon e plotë te ngjarjes.
Policia e Shtetit thekson nga ana tjetër se goditja e punonjësit të policisë është vepër penale dhe çdo punonjës policie, në bazë të nenit 133 të ligjit 108/2014 “Për policinë e shtetit” ka tagrin të reagojë, duke përdorur forcen, ndaj çdo shtetasi që e godet atë për shkak të detyrës.
DEKLARATA E PLOTE E POLICISE
“Më datë 21.08.2016 është arrestuar shtetasi Blerti Kola , 27 vjeç, banues në Lezhë, si dhe po punohet për kapjen dhe të vëllait të tij shtetasit Daniel Kola, 30 vjeç, banues në Lezhë. Nga veprimet hetimore të kryera nga oficerët e policisë gjyqësore të Prokurorisë së Rrethit Gjyqësor Lezhë, këta 2 shtetas duke udhëtuar me mjetin tip “Rover” në rrugën Shëngjin-Lezhë, në bashkëpunim me njeri-tjetrin, për shkak të detyrës, nuk i janë bindur urdhërit si dhe kanë ofenduar dhe goditur punonjësin e policisë të qarkullimit rrugor, inspektorin A.B., i cili pasi ka marrë ndihmen e nevojshme në spitalin e Lezhës është larguar për në banesë jashtë rrezikut për jetën. Vepra penale “Goditje për shkak të detyres” në bashkëpunim, parashikohet nga neni 237 e 25 i Kodit Penal. Në lidhje me këtë ngjarje, eshte publikuar dhe nje video ne mediat online. Drejtoria e Standarteve Profesionale në Drejtorinë e Policisë së Shtetit, ka nisur menjëherë verifikimet për veprimet e punonjësit të policisë rrugore, si dhe po bëhet kqyrja e kamerave të ambienteve përreth për të siguruar videon e plotë te ngjarjes. Policia e Shtetit bën me dije nga ana tjetër, se goditja e punonjësit të policisë është vepër penale dhe çdo punonjës policie , në bazë të nenit 133 të ligjit 108/2014 “Për policinë e shtetit” ka tagrin të reagojë, duke përdorur forcen, ndaj çdo shtetasi që e godet atë për shkak të detyrës”.
