Çfarë debutimi për Barcelonën! Ndeshja e parë e La Ligas ofronte për Barcën ekzibicionin në Camp Nou me trofeun e kampionatit të kaluar, dhe kampionët e nisën aty ku e kishin lënë, duke fituar dhe shkatërruar kundërshtarin. 6-2 ndaj Betis, Messi në superformë, ndërsa Suarez që e mbylli La Liga 2015-2016 me një tregolësh ndaj Granadas dhe 40 finalizime që i dhanë titutllin e kryegolashënuesit, e nisi La Liga 2016-2017 me një tjetër tregolësh.
Barcelona që e niste pa Iniesta, Mascherano, Neymar, Mathiey, Rafinha e Andre Gomes gjeti avantazhin që në minutën e 6 të takimit, me Arda Turan që shënoi lehtësisht i ftuar nga Jordi Alba.
Turku që po bën zëvendës/Neymarin në 10 ditë të gushtit ka shënuar 3 gola. Në minutën e 21 Betis barazoi me një godite të bukur të Ruben Castros që ndëshkoi Claudio Bravon.
Reagon me vonesë kiliani që është drejt largimit te Manchester City dhe është një gol i rëndësishëm pasi i jep fund serisë prej plot 816 minutash që katalanasit nuk pësonin gol. Gjithsesi nuk kishte peshë në rezultat, sepse pas barazimit Lionel Messi goditi traversën në minutën e 30, ndërsa pas 7 minutash coi Barcën sërish në avantazh duke shpikur një gol me të majtën e tij klasike.
Fantastik bjondi argjentinas, i rikthyer me grintë në këtë fillim sezoni. Në minutën e 42 ishte momenti i Luis Suarez që shënoi duke përfituar nga asisti perfekt i Sergi Robertos që po bën rolin e Dani Alves të larguar drejt Juves.
3-1 dhe ndeshja praktikisht kishte mbaruar që aty, pasi Betis u mbyll pas duke e bërë gjithcka më të lehtë për Barcën. Messi i ofroi mundësinë e një goli me portën bosh Luis Suarez në minutën e 56 dhe pas vetëm një minute vendosi të shënonte vetë edhe një tjetër sërish me të majtën.
Më pas ishte radha e El Pistoleri për të shënuar golin e 6 të Barcës, me uruguajanin që shënoi me një goditje dënimi, ndërsa ishte i padobishëm për Betis goli i dytë i Ruben Kastros. 6-2 dhe Barcelona e fillon sipas mënyrës së saj, tani topi i kalon Realit dhe Atletikos së Madridit që zbresin në fushë këtë të dielë, respektivisht përballë Real Societad dhe Alaves.
