Komisioni Qëndror i Zgjedhjeve i ka dhënë mandatin e deputetes Dhurata Çupit e cila ka zëvendësuar ish-deputetin e Partisë Demokratike për qarkun e Dibrës, Sherefedin Shehu.
Anëtarët e këtij komisioni kanë votuar për zëvendësimin e Shehut, duke e çuar kështu në 32 numrin e femrave deputete në Kuvendin e Shqipërisë.
Dhurata Çupi zëvendësoi Sherefedin Shehun, pasi ky i fundit ka vendosur që të kandidojë për kryetarin e bashkisë Dibër, post që u la bosh pas arrestimit të ish-kryetarit të saj Shukri Xhelili i cili u filmua duke kërkuar favore seksuale në këmbim të një vendi pune.
Po ashtu Komisioni Qëndror i Zgjedhjeve miratoi sasinë e fletëve të votimit që do të përdoret në procesin e afërt elektoral, për zgjedhjen e kreut të ri të bashkisë Dibër që do të mbahen më 11 shtator.
Në dispozicion të procesit do të jenë 58.158 fletë votimi që do të prodhohen dhe do i dërgohen Komisionit Zonal të Administrimit Zgjedhor, për t’u shpërndarë në 118 qendra votimi që ka kjo zonë elektorale.
Numri i zgjedhësve në këtë zonë zgjedhore, që do të thirren për të votuar për kryebashkiakun e ri të Dibrës rezulton me 57.018 zgjedhës, ndërsa në total do të prodhohen 58.158 fletë votimi.
