Publikohet një dëshmi e re në lidhje me vdekjen e të riut shqiptar Pëllumb Marknikolla në burgun e Athinës në Greqi.
Këtë herë ka qenë miku i tij me inicialet F.H., ai që ka folur për mediat, duke qenë se ka qenë pikërisht ky person që ka ndjekur ngjarjen nga fillimi deri në fund. Ai ka bërë me dije se gjithçka ka nisur pasi nuk kishte arritur të kontaktonte me mikun e tij prej disa ditësh dhe familjarët nuk ishin në dijeni për asnjë gjë në lidhje me pëllumbin. F.H. thotë se ka shkuar në komisariatin e policisë dhe punonjësit në Greqi i kanë thënë se Pëllumbi ka vdekur, është hedhur nga kati i katërt.
“I kërkova të shikoja kamerat, të hapja kamerat si ka ndodhur ngjarja por më thanë se serveri, kamerat aty nuk punofshin. Pas shumë orëve muhabet me ta tu u munu me kuptu se ku është trupi i tij, më thanë se e kan çu në spital në Athinë”, – tregon shoku i Pëllumbit. I pyetur nga gazetari nëse komisariati kishte kat të katërt, ai shprehet se polici në ato momente ishte i shokuar, i hutuar ndërsa bën me dije se kati i katërt që pretendon policia se është hedhur Pëllumbi nuk ekziston në atë komisariat.
I pyetur nga gazetari se pse ishte dërguar trupi në varreza dhe nuk u mbajt në spital, shoku i Pëllumbit thotë se “Trupi ishte pa emër e mbiemër, pa identitet. Ata kanë dash ta zhduk kufomën e tij bashkë me të vërtetën e çështjes e gjithë çfarë ka ndodh”. F.H. vijon rrëfimin duke thënë se djali i varrezave ngeli i shokuar e u tha që nuk kishte parë si kjo ngjarje. “Unë që merrem me këto punë ditë për ditë, mund t’ju them se ky person nuk ka rënë nga kati i katërt”, – kanë qenë fjalët e punonjësit të varrezave rrëfyer nga shoku i të ndjerit Pëllumb Marknikolla./News24
