Përmes një deklarate për shtyp me anë të zëdhënëses së partisë, Ina Zhupa, Partia Demokratike ka vijuar me sulmin ndaj kryeministrit Rama për atë që e konsiderojnë si “aferë” në lidhje me prishjen e stadiumit.
Sipas PD-së, qëllimi i vetëm i kryeministrit që shkatërron e prish pa i interesuar asgjë, bëhet me qëllim vënien në funksion sa më të shpejtë të planit të tij klientelist me ish-stadiumin, një plan, që sipas PD-së, i jep atij dhe ortakëve të tij pronësi të përjetshme të tokës publike në zonën më të shtrenjtë të vendit.
“Kësaj radhe shkatërroi monumentin e kulturës, siç ishte fasada e stadiumit ‘Qemal Stafa’, duke e cilësuar atë si një gjë pa vlerë, ndërkohë që ishte monument kulture, pjesë e një ansambli, e monument kulturor që duhej të ishte ruajtur aty ku ishte dhe ashtu siç ishte. Por Ramës i dukej e shëmtuar dhe vepër për tutkunët. Tashmë ka ngelur vetëm të shkatërrojmë kalatë, nëse nuk i përgjigjen shijeve të Ramës dhe ato të ndërtohen moderne nga Carapuli, Eftimi dhe Casamonti, me paratë e shqiptarëve dhe prona sigurisht t’iu kaloj atyre përjetësisht”, është shprehur Ina Zhupa.
Duke e krahasuar shkatërrimin e këtij monumenti kulture në mënyrë brutale, e që siç thonë demokratët, të ngjashme me mënyrën sesi ISIS shkatërroi Palmirën në Siri, Zhupa vijon:
“Të gjithë e kemi parë si punohej aty, fotot e nxjerra flasin vet. Me ketë gjest, ai ka shkelur Kartën shqiptare të Restaurimeve. Në nenin 5, për ndërhyrjet e ndaluara; në nenin 7, për masat paraprake të ndërhyrjes; dhe në shtojcën b, për mënyrën e ndërhyrjes. Aty është punuar me fadroma, ndërkohë që duhej punë e pastër me çekiç e me rregulla të qarta, për të ruajtur vlerat e monumentit”, tha zëdhënësja e PD-së.
Denoncimi vijon si më poshtë:
“Ligji dhe vendimet në këtë vend bëhen post mortum për të justifikuar klientelizmin dhe aferën me stadiumin. Rama prezanton projektin e Arenës Kombëtare me 21 prill 2016, që parashikon shembjen e stadiumit ekzistues. Më pas, më 25 maj 2016, KKR nxjerr vendimin që heq nga statusi monument kulture pjesën lindore, jugore dhe veriore të stadiumit, duke legjitimuar shkatërrimin që kishte shpallur Rama. Rama nis ‘de facto’ shembjen e stadiumit ‘Qemal Stafa’ më 6 qershor 2016. Më pas, më 01 korrik 2016, KKR merr vendim mbi miratimin e projektit të restaurimit të fasadës perëndimore të stadiumit. Ndërkohë, aty kishte një muaj gati që punohej pa projekt restaurimi, duke shkelur ligjin.
I kërkojmë Ramës dhe institucioneve që tashmë i ka kthyer në mekanizma të plotësimit të planeve korruptive të vënë në dispozicion të publikut dokumentacionin përkatës që detyron ligji sipas Kartës. Që do të thotë ‘çdo ndërhyrje duhet që paraprakisht të jetë e motivuar dhe e preventivuar me shkrim. Duke mbajtur në vazhdim një ditar sipas një formati të përcaktuar më parë, të cilit do ti bashkëngjitet një relacion përfundimtar shoqëruar me dokumentacion fotografik, përpara, gjatë dhe pas ndërhyrjes’.
Rama me planin e tij tregon edhe njëherë që nuk ka asnjë asnjë lidhje me sportin dhe me kulturën. Plani i tij pa standarde olimpike për stadiumin e kthyer në qendër biznesi do të marr fund sapo Partia Demokratike të marr drejtimin e vendit. Ne do ja u kthejmë stadiumin sportdashësve dhe çdo monument kulture do ruhet me fanatizmin që i takon. Edhe për sportin e për kulturën Shqipëria është më mirë pa Edi Ramën”.
