Diskriminimi në Maqedoni duket se po vazhdon edhe pas përmbytjeve të pak ditëve më parë, pasi banorët ankohen se ndihmat e shtetit nuk po ndahen në mënyrë proporcionale dhe se prania e ushtrisë dhe ekipeve e mjeteve të mekanizuara për pastrimin e rrugëve e shtëpive si dhe ushqimi janë përqendruar në fshatin Stajkovcë të banuar me maqedonas.
Hasanbegu, që është lagja periferike në lindje të Shkupit ka mbi 15 mijë banorë. Jo vetëm banorët por edhe ekspertët vlerësojnë se mungesa e infrastrukturës apo mirëmbajtja e saj ka lënë pasojat që këto vendbanime nuk i kishin përjetuar kurrë më parë.
Nazmi Abdyli, banor dhe aktivist fajëson në veçanti pushtetin lokal për mosinteresimin e mëhershëm për mirëmbajtjen e kanalit për kullimin e ujërave.
“Ne kemi një kanal që mbledh ujërat atmosferikë dhe fekale të krejt këtyre fshatrave dhe pushteti lokal kurrë s’ka pasë gatishmëri për pastrimin e tij që të mos vinte deri tek kjo gjendje. Në atë rast përmasat, do të thoja, do të ishin më të vogla sikur kanali të kishte qenë i hapur me kohë.
Pjesa dërrmuese e popullatës është xhvendosur nëpër familjarë, ndërsa vetëm rreth 30 për qind e tyre ndodhen në fshat… nuk ka kurrfarë kushtesh. Përfaqësues të partive politike dhe pushtetit tash dalin, por e bëjnë për pikë politike. Tash është shumë vonë”, thotë Nazmi Abdyli për Zërin e Amerikës.
Ekspertët paralajmërojnë se edhe pasi të hiqet balta do të mbetet pluhur i ndotur nga përbërja e ujërave të zeza nga kanalizimi dhe se kontakti me të sjell rrezik nga sëmundjet ngjitëse.
Nga ana tjetër, Kryqi i Kuq i Maqedonisë thotë se ka ndarë disa mijë paketa me ndihma në zonat e përmbytura dhe se nuk bëhen dallime në baza etnike, fetare apo politike.
Nga përmbytjet në Maqedoni humbën jetën 23 persona, ndërsa shumë të tjerë u evakuuan pas reshjeve të dendura të shiut të shtunën e kaluar.
