5 shqiptarë janë arrestuar pasi u kapën nga policia italiane në Ancona ndërkohë që po shkarkonin rreth dy ton marijuanë nga skafi me të cilin kishin kaluar Adriatikun, raporton Corrriere Adriatico. Në vend të pritësve që do të merrnin mallin shqiptarët kanë gjetur në vendin e shkëmbimit forca të shumta policore.
Operacioni është ndërmarrë ndërsa trafikantët ishin fshehur nën një urë hekurudhore. Shqiptarët kanë tentuar të arratisen, por janë bllokuar nga oficerët e policisë.
“Është hera e parë që në brigjet tona është tentuar të shkarkohet një sasi kaq e madhe e drogës”, shkruan Corriere Adriatico. Skafi me të cilin është transportuar droga ishte i një gjatësie prej 8 metrash dhe i pajisur me dy motorë të jashtëm.
