Një vendim i doganave për të riklasifikuar lenden e parë me kod Doganor 5903 10 90, çka bën që ky produkt tashmë të paguajë një tarifë doganore prej 10% ka acaruar eksportuesit e këpucëve.
Ndryshimi ka ardhur pasi Drejtoria e Laboratorit Doganor në Departamentin Teknik të DPD ka riklasifikuar lëndën e parë me Kod Doganor 5903 10 90 (prodhim këpucësh për rieksport). Kjo lëndë e parë vjen në Shqipëri prej dy dekadash me po këtë kod dhe po kështu ajo lëviz edhe në vendet e BE-së me këtë kod të unifikuar. Drejtoria e mësipërme ka riklasifikuar këtë produkt duke e përfshirë atë në Kodin Doganor 6005 33 90. Subjektet që punojnë me këtë material prej vitesh e kanë tarifën doganore ZERO për qind, pas këtij riklasifikimi do të duhet të paguajnë në doganë tarifën doganore prej 10%.
Në një letër që Dhoma Kombëtare e Prodhueseve të Veshjeve dhe Këpucëve i ka dërguar Ministrisë së Financave thuhet se:
I nderuar zoti ministër i Financave!
E nderuar znj. Drejtore e Përgjithshme
Dhoma Kombëtare e Prodhuesve të Veshjeve dhe të Këpucëve (DHKPV), si e vetmja organizatë ligjore punëdhënësish, që përfaqëson interesat e sipërmarrjeve në fushën e rregjimit të përpunimit aktiv dhe eksportit, iu drejtohet me shqetësimin si më poshtë vijon:
Drejtoria e Laboratorit Doganor në Departamentin Teknik të DPD ka realizuar, me kërkesë të Zyrës së Kontrollit Aposterior të Degës së Doganës Durrës, një verifikim të llojit të mallit dhe klasifikim doganor për importe të subjekteve të rregjimit të përpunimit aktiv (prodhim këpucësh për rieksport) lëndën e parë me Kod Doganor 5903 10 90. Kjo lëndë e parë vjen në Shqipëri prej dy dekladash me po këtë kod dhe po kështu ajo lëviz edhe në vendet e BE-së me këtë kod të unifikuar. Drejtoria e mësipërme ka riklasifikuar këtë produkt (nuk dihet se për cilën arsye!) duke e përfshirë atë në Kodin Doganor 6005 33 90. Me fjalë të tjera, subjektet që punojnë me këtë material kompensues porositësi prej vitesh me tarifë doganore ZERO për qind, pas këtij riklasifikimi do të duhet të paguajnë në doganë tarifën doganore prej 10 % (?!!). Por edhe një gjobë administrative prej 30.000 lekësh, për çdo praktikë doganore të subjekteve tona, në bazë të nenit261/1/4 të Ligjit nr 8449, dt 27.01.1999 “Kodi Doganor i RSH”. Dhoma Kombëtare e Prodhuesve të Veshjeve dhe Këpucëve gjykon se ky klasifikim i ri tarifor nuk ka asnjë lidhje me produktin kompensues ndihmës (lëndë e parë) dhe nuk është një produkt i ri, si ai që parasheh kodi 6005 33 90. Asnjë subjekt nuk ka interes të ndryshojë klasifikimin tarifor për produktet kompensuese, duke qënë se ato janë serisht në rregjimin e përpunimit aktiv dhe detyrimi doganor është i njëjtë. Dhoma Kombëtare e Prodhuesve të Veshjeve dhe Këpucëve është e shqetësuar, se ndërsa po bashkëpunon me autoritetet fiskale (posaçërisht me ato doganore dhe Ministrinë e Financave) për të ndryshuar në mënyrë urgjente tarifat doganore për lëndët e para dhe ndihmëse që furnizohen nga tregu joeuropian, përballet me penalitete që vijnë nga administrata për ndryshimin e klasifikimit tarifor për produkte kompensuese që janë trajtuar me trajtim tarifor preferencial, duke qënë se nuk shkaktojnë shmangje nga detyrimi i importit. Dhoma Kombëtare e Prodhuesve të Veshjeve dhe Këpucëve i kërkon autoriteteve të anashkalojnë gjobat e kësaj kategorie, të krijojnë një klimë më të mirë për biznesin e rregjimit të përpunimit aktiv dhe të ndikojnë në rritjen e ekporteve shqiptare dhe jo pengimin e tyre. Ne gjykojmë se pretendimi i ngritur nga Drejtoria e Laboratorit Doganor në Departamentin Teknik të DPD për riklasifikimin tarifor të kodit ekzistues për të njëjtën lëndë të parë dhe sidomos pretendimi i autoriteteve të ministrisë se duhet që “subjektet tona të paguajnë një laborator ndërmbëtar (në Itali) për të ribërë të njëjtën analizë që ka bërë drejtoria e mësipërme”, është jashtë realitetit dhe është fyes për të gjithë subjektet tona. Kërkojmë ndërkyrjen tuaj të menjëhershme për të korrigjuar sa më sipër!
Duke shpresuar në bashkëpunimin e ndërsjelltë
Me respekt BORDI DREJTUES DHOMA KOMBËTARE E PRODHUESVE TË VESHJEVE DHE KËPUCËVE (DHKPV)
