Te Interi nis një epokë e re, epoka e Frank De Boer. Pasi u zyrtarizua si trajneri i ri i klubit zikaltër mëngjesin e kësaj të Marte, holandezi u prezantua përpara mediave si timonieri i ri i skuadrës.
De Boer ka firmosur një kontratë 3-vjecare me Interin nga e cila do të përfitojë 2 milionë Euro në sezonin e parë dhe 3 milionë Euro në dy sezonet pasardhëse. Pas 6 viteve si trajner te Ajaxi ku fitoi 4 tituj kampion në Eredivisie, 46-vjecari nis një aventurë të re më të rëndësishmen në karrierën e tij.
Te Interi De Boer zëvendëson Roberto Mancinin i larguar zyrtarisht paraditen e të Hënës. Në konferencën për shtyp ishin të pranishëm edhe disa nga drejtuesit e Interit duke filluar nga shefi ekzekutiv Michael Bolingbroke për të vazhduar me drejtorin sportiv Piero Ausilio apo edhe zëvendëspresidentin e klubit Javier Zanetti. Në prezantimin e De Boer fillimisht fjalën e mori shefi ekzekutiv Bolingbroke i cili uroi mirëseardhjen trajnerit holandez duke u shprehur me superlativa për karrierën e deritanishme të De Boer si futbollist por edhe si trajner. Më pas vëmendja ishte e gjitha për 46-vjecarin holandez .
“Në radhë të parë dua të falenderoj Interin për këtë mundësi, të gjithë personat që janë pjesë e Interit duke filluar nga Zhang Jindong për të vazhduar me Erick Thohir-in, pasi të gjithë flasin të njëjtën gjuhë që flitet te Interi. Për mua është dicka shumë e rëndësishme që të gjithë duan ta cojnë klubin aty ku e meriton. Mezi po pres momentin për të filluar nga puna, jam i emocionuar. Dua të njoh menjëherë të gjithë personat që janë pjesë e Interit. Dy javë janë me të vërtetë pak por duhet të jemi gati, do të punojmë fort për arritur objektivat tona”.
Te Interi Frank De Boer gjen një skuadër të ndërtuar nga një trajner tjetër pikërisht nga Roberto Mancini por ky fakt nuk përbën asnjë lloj problemi për holandezin, i cili më pas foli edhe për Mauro Icardin duke e konsideruar kapitenin si pjesë të rëndësishme të projektit të tij zikaltër.
“Nuk ndodhemi në situatën ideale dhe kjo është mëse e qartë, por kemi në skuadër lojtarë me eksperiencë të madhe mbi supe dhe të rinj premtues dhe kjo është ajo që vlen. Unë do të përpiqem të përcjell te ta idetë e mia, të gjithë mund të mësojnë dhe mund të përshtaten shpejt. Nuk do të ndryshojmë gjithcka por unë dhe stafi kemi filozofinë tonë. Duhet të besojmë se mund të arrimë gjëra të mëdha në këtë sezon. Icardi? Ai është i ri dhe mund të mësojë ende shumë gjëra. Deri tani ka treguar se është i aftë të dhurojë paraqitje fantastike, besoj se do të punojmë shumë mirë sëbashku dhe nuk do të kemi probleme. Icardi nuk largohet ai do të qëndrojë te Interi”.
De Boer mohoi zërat se përpara pak muajsh ka patur kontakte mes tij dhe drejtuesve të Milanit për të marrë drejtimin e kuqezinjëve, ndërkohë që thumboi në një farë mënyre menjëherë Juventusin duke u shprehur se bardhezinjtë nuk janë një skuadër e pathyeshme edhe pse kanë zhvilluar një merkato shumë cilësore.
“Asgjë nuk është e pamundur, askush nuk është i pathyeshëm. Ka nga raste kur gjërat ndryshojnë. Juventusi është përforcuar por objektivi ynë është të jemi më pranë tyre se sezonet e kaluara. Do të luftojmë në maksimum për tua bërë jetën më të vështirë”.
