Ka shumë pak klube në botë, të cilat mund të përballojnë Cristiano Ronaldon. Dhe jo vetëm financiarisht, por edhe në aspektin e markës. Në fund të fundit, duhet që vetë ylli portugez të përshtatet me gjithçka dhe të ndihet rehat. Një nga klubet që me të vërtet kanë çdo element për të transferuar sulmuesin e Real Madridit është Bayerni. Sidomos tani që Carlo Ancelotti drejton skuadrën.
Tekniku italian ka punuar me 31-vjeçarin në dy sezone dhe e njeh mirë atë, kështu që kurrsesi nuk mund t’i shpëtojë pyetjes nëse Cristiano një ditë do të bëhet bavarez. Kështu, në revistën gjermane “Kicker”, Ancelotti u pyet: “Cristiano Ronaldo ka thënë se do të ishte gati të mësojë çdo gjuhë, që të kthehej sërish me ty në një skuadër. A mund t’i thuash atij se gjermanishtja nuk është edhe aq e vështirë?” Italiani u përgjigj duke qeshur: “Po, gjermanishtja është shumë e lehtë”. Pastaj foli seriozisht: “Ka disa lojtarë të cilët prezantojnë klubet e tyre. Paolo Maldini për Milanin, Lionel Messi për Barcelonën, Thomas Müller, Manuel Neuer, Philipp Lahm këtu për Bayernin. Këta lojtarë nuk mund të shkojnë në klube të tjera. Ronaldo është njëri prej tyre.
Ai i përket Real Madridit”. Pra, tifozët bavarezë e morën përgjigjen: Ronaldo nuk blihet! “Ai është lojtar i një kategorie të veçantë“, – shtoi tekniku. Dakord, por çfarë lloj lojtari do të mirëpriste italiani në Mynih? “Mbi të gjitha, unë i dashuroj lojtarët me të vërtet profesionalë. Nëse kombinon cilësinë me profesionalizmin, kjo është një dhuratë nga Zoti. Për shembull, pikërisht si Cristiano Ronaldo. Unë e di si është ai dhe si punon. Ai është një lojtar absolutisht profesional dhe serioz.
Ashtu edhe Zlatan Ibrahimovic apo Kaka. Ata janë tërësisht të përqendruar në profesionin e tyre”, – shpjegoi Don Carlo, i cili në fund zbuloi një lojtar të këtyre parametrave, të cilin e ka te Bayerni. “Robert Lewandowski është një sulmues shumë i fortë, nga më të mirët”, – përfundoi strategu i bavarezëve.
