Kryeministri Edi Rama ka publikuar disa foto në facebook nga fshati turistik i Dardhës, ku reklamon investimet, rrugën e bërë.
“Rilindja Urbane në Korçë. Dardha turistike me një rrugë të re që po ndikon ndjeshëm në rritjen e numrit të vizitorëve dhe zhvillimin ekonomik të zonës”, shkruan Rama.
Por nga ana tjetër, qytetarët dhe ndjekësit e tij në facebook e kritikojnë se në foto janë vetëm 2 km rrugë brenda fshatit, ndërsa rruga deri atje është e pakalueshme.
“Miza që të hash ti zoti kryeministër me atë 0.5 kilometrin që ke bërë se rrugët e tjera kryesore s’kanë rëndësi, le të vdesin njerëzit përditë”, i thotë një komentuese.
“Po rrugën që të arrish deri në Dardhë…pse nuk e reklamoni ..??? Që të kënaqen të gjithë me rrugën që kemi!”, shkruan një tjetër.
“O shoku kryeministër ok ato 2 km brenda fshatit… por deri në Dardhë si do shkosh? Atë rrugë rregullo!”, shkruan një qytetar, ndërsa dikush i përgjigjet që do shkojë me avion.
Të vetmit që e kanë komplimentuar janë ata që nuk kanë qenë ndonjëherë në Dardhë dhe nuk e dinë se të shkosh deri atje është një peripeci e Odise më vete, pasi rruga është në gjendje të mjerueshme.
