Bayerni nuk ngjan më me një “puzzle”. Skuadra kampione e Gjermanisë sot ka marrë pothuajse formën e saj përfundimtare, teksa në stërvitjen pas turit në SHBA sot u paraqitën dy të transferuarit në merkaton e verës, Mats Hummels dhe Renato Sanches.
Kjo ishte seanca e parë stërvitore e tyre nën drejtimin e trajnerit Carlo Ancelotti, “prurja” kryesore e klubit bavarez pas largimit të Pep Guardiolës. Hummels i kushtoi 38 milionë euro Bayernit, ndërsa për portugezin shuma e transferimit shkon deri në 80 milionë euro, nëse 18-vjeçari “kalon klasën” duke shfrytëzuar klauzolat e përcaktuara në kontratë. “Hummels ka përvojë në Evropë dhe është pjesë e kombëtares gjermane.
Ai luan mirë bashkë me Boatengun. Përveç kësaj, ai është një lojtar të cilin Bayerni e ka pasur në dorë”, – tha Ancelotti, teksa më pas lavdëroi Sanchesin, kampionin e Evropës me Portugalinë. “Ai është një lojtar i shkëlqyer dhe ende shumë i ri. Ne duhet të jemi të kujdesshëm me të. Jam shumë kurioz ta shoh se si do të jetë me ne”, – u shpreh italiani. Renato Sanches (d) u shpall “Lojtari i ri më i mirë” i Kampionatit Evropian 2016 Edhe Manuel Neuer, Robert Lewandowski, Kingsley Coman, Joshua Kimmich dhe Thomas Müller, të rikthyer nga pushimet pas Kampionatit Evropian të Francës, u bashkuan me skuadrën në stërvitje.
Dëmtimet? Pak, por … saktë, fatkeqësisht. Mbrojtësi Jerome Boateng tha se i duhen edhe një javë apo dhjetë ditë për të nisur vrapimet e para pas dëmtimit muskular në Francë, ndërsa Arjen Robben dhe Douglas Costa kanë nevojë për më shumë kohë për t’u rikthyer në fushë. Mats Hummels do të luajë ndeshjen e parë kundër Dortmundit në Superkupën e Gjermanisë Më 14 gusht, gjërat bëhen serioze për Ancelottin.
Skuadra e tij duhet të karikojë mirë bateritë për Superkupën e Gjermanisë, aty ku e pret Dortmundi. “Çdo kompeticion është i rëndësishëm. Kjo është një finale. Jam me fat që do të jem pjesë e saj, sepse nuk kam punuar për të”, – tha tri-herë fituesi i Ligës së Kampionëve, i cili shtoi: “E di se në Dortmund nuk do të jetë e lehtë, por ne do të japim më të mirën dhe do të përpiqemi të fitojmë.”
I pyetur për gjendjen fizike të bavarezëve, 57-vjeçari u përgjigj: “Kemi nëntë ditë për t’u përgatitur për Superkupën. Kjo nuk është e mjaftueshme për të qenë gati për gjithë sezonin, por është e mjaftueshme për këtë ndeshje.” Guardiola i ka humbur të trija finalet e tij në Superkupën e Gjermanisë. Një humbje e katërt do të ishte rekord i zi për Bayernin. Don Carlo, ruaju mirë!
