Pronari i hotelit në Velipojë ku kishin prenotuar të rinjtë që humbën jetën në hidrovorin e Vilunit, thotë se policia nuk ka kryer asnjë kontroll në dhomën ku qëndronin dhe ndodheshin sendet e tyre, duke bërë të mundur edhe identifikimin e njërit prej të rinjve italianë.
Dy ditë pas ngjarjes, kur Policia nuk “arrin” dot të identifikojë viktimën e katërt të aksidentit, askush nuk ka marrë mundimin të kontrollojë dhomën ku të rinjtë kishin prenotuar të flinin dhe ku presupozohet që aty të ndodhet edhe pasaporta e të riut. Pjerin Jakaj, pronari i hotel “Jakaj”, tregon se tre të rinjtë italianë kishin prenotuar të flinin për 5 net në hotelin e tij.
“Vajza erdhi me dy italianë dhe ka paguar dhomën me numrin 37 në hotel ‘Jakaj’ për 5 ditë. Artenisa e Giorgio kanë ardhur më përpara, ndërsa italiani tjetër (Giovanni Sandguedolche) erdhi me vonesë. Pasi kanë zënë dhomën dhe kanë lënë gjërat e tyre, kanë ngrënë darkën në hotelin tonë. Dhoma që kanë zënë ata ende është e bllokuar, sepse në fakt pres që të vijë Policia. Më ka thënë që të mos prek asgjë dhe ashtu kemi bërë. Nuk kemi hyrë asnjë brenda dhe dhoma është e mbyllur derisa të vijë Policia. Kur mora vesh se kishte ndodhur aksidenti, atëherë unë lajmërova Policinë dhe ajo ka ardhur te hoteli ynë dhe vetëm sa i ka identifikuar si persona, ndërsa nuk janë futur ende në dhomë”, u shpreh Jakaj, shkruan Panorama.
Sipas tij, rreth orës 20:00 kanë ngrënë darkën dhe rreth orës 21:00 kanë dalë nga hoteli për të mos u kthyer më. “Me familjarët e Giorgios ne nuk kemi komunikuar, as me nënën e vajzës nga Lezha, e cila më kishte marrë më përpara për të më treguar se vajza e saj do të vinte bashkë me shoqërinë. Me familjarë të personit të tretë ne nuk kemi komunikuar sepse ata nuk dinë asgjë, të paktën zyrtarisht, se çfarë ka ndodhur dhe se ku gjendet djali i tyre. Dyshojnë se ka humbur jetën, por ende s’kanë një përgjigje zyrtare. Nuk i kam dokumentet e tij, sepse ai erdhi me vonesë dhe nuk është paraqitur për hotel, por veç për darkë”, u shpreh pronari i hotel “Jakaj”.
