Një sherr me thika ka ndodhur në tragetin Ankona-Durrës duke alarmuar pasagjerët e tjerë. Sipas të dhënave zyrtare, një çift kosovarësh Altin dhe L. Hakami janë konfliktuar me 5 shtetas nga Maqedonia dhe Mali i Zi.
Sipas policisë, 36-vjeçari kosovar Altin Hakami më pas ka plagosur me thikë 28-vjeçarin me iniciale V.M., nga Mali i Zi, i cili ndohet në gjendje të rëndë në Spitalin Ushtarak si dhe 3 persona të tjerë. Edhe vetë kosovari dhe bashkëshortja e tij kanë marrë lëndime të lehta.
36-vjeçari më pas është arrestuar nga policia, ndërsa ka nisur procedimi penal në gjendje të lirë për 4 shtetasit nga Maqedonia dhe Mali i Zi. Dyshohet se sherri ka pasur motive etnike.
NJOFTIMI I POLICISË
Specialistët e Sektorit Kundër Krimeve të Rënda në Drejtorinë Vendore të Policisë Durrës, arrestuan në flagrancë shtetasin:
•Altin Hakami 36 vjeç, lindur në Mitrovicë, Kosovë dhe banues në Londër.
Gjithashtu filloi procedimi penal në gjendje të lirë në ngarkim të shtetasve:
• Dalibor Jovanoviç, 36 vjeç, banues në Maqedoni;
• Viktor Krstevski, 34 vjeç, banues në Maqedoni;
• Dragan Kovaçeviç, 29 vjeç, banues në Malin e Zi;
• Dragis Gogiç, 25 vjeç, banuese në Malin e Zi.
Më datë 03.08.2016, rreth orës 03:30, në tragetin e udhëtarëve të linjës Ankona – Durrës, duke qenë në lundrim, pas një konflikti për motive të dobëta, shtetasi Altin Hakami ka plagosur me thikë shtetasin V.M.28 vjeç, banues në Malin e Zi.
Për pasojë, shtetasi i mësipërm ndodhet në Spitalin Ushtarak Tiranë,në gjendje të rëndë shëndetësore.
Gjithashtu janë plagosur lehtë shtetasit Dragan Kovaçeviç, Dragisa Gogiç dhe Viktor Krstevski.
Gjatë konflkitit kanë marrë dëmtime edhe shtetasi Altin Hakami dhe bashkëshortja e tij shtetësja L. Hakami 35 vjeçe, banuese në Londër, të cilët ndodhen në Spitalin Rajonal Durrës jashtë rrezikut për jetën.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale:
“Plagosje e rëndë me dashje” parashikuar në nenin 88 të Kodit Penal në ngarkim të shtetasit Altin Hakami;
• “Plagosja e lehtë me dashje” parashikuar në nenin 89 të Kodit Penal në ngarkim të shtetasve Dalibor Jovanoviç, Viktor Krstevski, Dragan Kovaçeviç dhe Dragisa Gogiç.
