Partia Demokratike vijon të kërkojë përgjigje për foton e kryeministrit Edi Rama me presidentin amerikan Barack Obama.
Sekretarja e Marrdhënieve me Publikun në PD, Grida Duma i ka drejtuar disa pyetje, kryeministrit ndërsa aludon se trafikantët që kanë mbjellë kanabis në vend i kanë paguar 80 mijë dollarët e fotos.
“Edi Rama bën vazhdimisht paradë arrogante me foto të ditës, por ai ende nuk po jep një shpjegim publik, për foton e tij të jetës, atë me presidentin Oabama, për të cilën pagoi 80 mijë dollarë, duke financuar një krim të rëndë federal. Dy vetë në Amerikë presin burgun dhe gjobën për krimin e kryer, futjen e parave nga një burim i huaj. Shtetasi me origjinë greke Argeros që mundësoi transferimin e parave, dhe Bilali që siguroi biletën për Ramën në një aktivitet në tetorin e vitit 2012.
Të dy e kanë pranuar krimin dhe pritet të dënohen në vjeshtë me 5 vite burg e 250 mijë dollarë gjobë, për futjen e parave të pisëta në fushatën presidenciale nga një burim i huaj.
E gjitha, për ti siguruar Edi Ramës një shtrëngim duarsh me Obamën dhe një foto, e cila u përdor nga shefi i rilindjes në fushatën elektorale të vitit 2013 për të ardhur në pushtet”, tha ajo.
Sipas saj, për këtë aferë, Edi Rama ka qënë në faqet kryesore dhe në kronikat e medias më të rëndësishme të botës. “Nga Uashingtoni në Bruksel e dinë se ai pagoi 80 mijë dollarë për një foto.
Kur, edhe sa kohë Rama nuk do të kthejë përgjigje? Cdo shqiptar kërkon të dijë se ku i mori paratë?
Kush është burimi i tyre? A janë para të ligjshme, apo para krimi? A janë para droge?
Para të trafikantëve me të cilët erdhi në pushtet, me të cilët ka mbuluar sot gjithë Shqipërinë me kanabis, duke mbytur ekonominë e ndershme, duke rritur kriminalitetin, duke asfiksuar cdo aktivitet të ligjshëm”, deklaroi Duma.
AJo theksoi se shqiptarët e dinë se Shqipëria është më mirë pa Edi Ramën.
“Ai mund të heshtë për këtë fakt, mund të fshehë burimin e 80 mijë dollarëve. Po shqiptarët e kanë kuptuar, e dinë dhe janë gati ta tregojnë se Shqipëria është më mirë pa Edi Ramën”, tha ajo.
