Kur kanë mbetur vetëm pak ditë, nga koha kur maturantët duhet të hedhin në letër dhjetë preferencat e – tyre në formularin e aplikimit, Universiteti i Mjekësisë ka bërë një ndryshim në kriteret e pranimit të studentëve që pranohen në ciklin e parë.
Bëhet fjalë për mënyrën e përllogaritjes së notës mesatare, e cila me vendimin e ri nuk do të jetë mesatarja e ponderuar (për kredit), por mesatarja e thjeshtë aritmetike. Kjo ka ngjallur shqetësime dhe konfuzion te nxënësit, ndërkohë që vetë Rektorati i UM-së ka dalë me një njoftim, ku sqaron formulën dhe rregullat që do ndiqen për shpalljen e fituesve. Ndërkohë, duke iu referuar uljes së numrit të kuotave, vendimi citon se ajo është ndërmarrë për hir të cilësisë së mësimdhënies dhe plotësimit të kritereve të akreditimit.
1. Kriteret për pranimin në Universitetin e Mjekësisë, Tiranë, përbëhen nga: a. Nota mesatare aritmetike e thjeshtë e Maturës Shtetërore 35 %. b. Nota mesatare aritmetike e thjeshtë e 3 viteve të shkollës së mesme 35%. c. Nota mesatare aritmetike e thjeshtë për lëndët formuese 30 %: Kimi 10% Biologji 10% Fizikë 10%
2. Nota mesatare për pranimin në programet e studimeve të integruara, si Mjekësi e Përgjithshme, Stomatologji dhe Farmaci është 8,5. Nota mesatare për pranimin në programet e studimit të Fakultetit të Shkencave Mjekësore Teknike, si Infermieri e Përgjithshme, Mami, Fizioterapi, Teknik i Lartë Laboratori, Imazheri dhe Logopedi është 8.
3. Ndryshimet nga vendimi fillestar për heqjen e lëndëve të filozofisë dhe sociologjisë, si dhe përdorimi i mesatares aritmetike janë vendosur nga Senati Akademik i Universitetit të Mjekësisë, Tiranë, për shkak se dy lëndët e mësipërme nuk janë pjesë e kurrikulës së detyruar në të gjitha shkollat e mesme dhe jo të gjitha shkollat e mesme në Republikën e Shqipërisë kanë programe me kredite. Kjo gjë mund të bënte të pamundur vlerësimin real të studentëve.
4. Për klasifikim janë përdorur koeficiente të ndryshëm të shkollave të mesme, ku ato me kohë të të plotë kanë koeficient 1,4, ndërsa të gjitha shkollat e tjera të mesme kanë koeficientin 1.
5. Në rast se kandidatët kanë të njëjtin numër pikësh, për t’u përzgjedhur në Universitetin e Mjekë- sisë, Tiranë, ka përparësi mesatarja e provimeve të Maturës Shtetërore. Në rast se edhe mesatarja e Maturës Shtetërore është e njëjtë, përzgjedhja do të bëhet me short në praninë e kandidatëve.
6. Për përpunimin e të dhënave dhe renditjen e studentëve sipas kritereve të miratuara po realizohet një marrëveshje me Qendrën Ndëruniversitare të Shërbimeve dhe Rrjetit Telematik (RASH), me qëllim krijimin e një programi kompjuterik për përpunimin e të dhënave dhe renditjen e kandidatëve.
