Deputetja demokrate, Majlinda Bregu thotë se shqetësimi i vetëm i saj është rikthimi i PD në pushtet me alternativë qeverisjeje serioze.
Bregu duke dashur të shuajë zërat pas ‘rebelimit’ të saj në grupin e PD për reformën në drejtësi ku u përfol si pjesë e një skenari ‘shpëtimi’ të qeverisë Rama deklaro se nëse do të ketë një qeveri Rama2 nuk do të jetë pjesë e saj, por as edhe e një makinacioni MetaX.
“Sqarim!Dy fjalë atyre që lexojnë portalet mediatike ku përflitem si pjesë e një skenari “shpëtimi” të qeverisë Rama1 përmes një qeverie Rama2, (përballë kërcënimit të supozuar nga një manovër MetaX në bashkëpunim të supozuar nuk e di se me kë, në partinë ku unë bëj pjesë!)…
Nuk e di a është një fantazi vere për arsye të vapës dhe thatësirës së lajmeve, apo është një diversion i sponsorizuar nga njëri prej dy partnerëve të çiftit të palumtur, pra Rama ose Meta.
Ajo që di unë, është që s’jam marrë asnjë minutë me hallet e çiftit dhe të partive respektive. Nuk kam patur asnjë ditë pikën e dëshirës për të qarë hallet e palumturisë së lidhjes së tyre.
Nga ana tjetër kam qenë e qartë në çdo deklarim qysh prej “kurorëzimit” të lidhjes së çiftit Rama-Meta, që janë për njeri-tjetrin, siç thotë populli në raste martesash jo fatlume: dy gjarpërinj në një jastëk!
Më kanë dalë dhe tepruar hallet e partisë time që duhet të bindë njerëzit se nuk janë krejt pa shpresë.
Ndarja mes Konfliktualit dhe Konsensualit nuk mund të jetë për asnjë moment shpresa e PD për t’u rikthyer në qeveri.
Rikthimi i PD në pushtet me alternativë qeverisjeje serioze, është i vetmi hall që më shqetëson.
Sidoqoftë, për sa më takon është e sigurt se:
Nëse do ketë një qeveri Rama2, unë NUK do të jem pjesë e saj dhe nëse do ketë një makinacion MetaX unë NUK do të bëhem pjesë e tij! Kështu që kush ka fantazuar rreth meje në vorbullën e halleve të çiftit të palumtur, le të kërkojë gjetkë lajme verore. Ndërsa në qoftë diversion, keqardhje për autorët dhe shpërndarësit e ‘informacionit'”, shkruan Bregu.
