Gjykata e Tiranës shpalli fajtorë dy kushërinj nga Tapiza e Krujës, të cilët, duke u hequr si punonjës të Policisë së Shtetit, kanë tentuar të përfitojnë para nga disa drejtues automjetesh. Ata u kallëzuan nga dy shoferë, të cilëve u kishin kërkuar që të kontrollonin dokumentet e mjetit me pretendimin se “po bënin kontrolle, pasi kishte ndodhur një vrasje në Tiranë”.
Të pandehurit Halil dhe Shaban Topalli u deklaruan të fajshëm për akuzën e “përvetësimit të titullit apo detyrës shtetërore” dhe u dënuan me nga 6 muaj e 20 ditë burg. Referuar vendimit të shpallur më 22 korrik, të afërmit Topalli janë autorët e ndalimit të dy shoferëve më 19 mars 2016 pranë rrethrrotullimit të Kamzës, në drejtim të Tapizës.
Sipas Gjykatës, kallëzuesi B.K. ka qenë në këtë aks rreth orës 03:30, kur i ka dalë në mes të rrugës një person, i cili i ka kërkuar të ndalonte automjetin. Pas ndalimit të mjetit janë afruar dy persona, njëri nga krahu i shoferit dhe tjetri nga krahu i pasagjerit, të cilët janë prezantuar si punonjës të Policisë së Shtetit, por nuk kanë pasur uniformë policie, tabela apo shenja të tjera identifikuese të policisë.
Duke dyshuar se ata nuk ishin policë, drejtuesi i mjetit nuk i ka dhënë dokumentet. Në këtë moment është afruar një autoveturë ngjyrë blu e errët, nga e cila ka zbritur një person. Sipas Gjykatës, në këtë moment dy “policët” i kanë thënë “Komandant bëre mirë që erdhe, se personat po kundërshtojnë për të dhënë dokumentet”.
Ky person, pasi është shtirur sikur ka kryer një bisedë telefonike për verifikimin e targës, e ka lejuar automjetin e kallëzuesit të largohej. Në të njëjtën datë, rreth orës 04:50, ka ndodhur e njëjta situatë me shtetasin H.S., drejtues i një kamioni.
Atij i ka prerë rrugën automjeti “Ford Focus”, ngjyrë blu i errët, nga i cili ka zbritur një person.
“Jemi Policia e Shtetit dhe do të bëjmë kontroll se ka ndodhur një vrasje në Tiranë”, i ka thënë ai. Nën presion, shoferi është bindur të hapë kamionin për kontroll, por “polici” i ka thënë “Lëre atë, po a keni ndonjë lekë se i do shefi që është përpara në mjetin tonë”.
“Pas kësaj kërkese, kallëzuesi ka dyshuar nëse ishin apo jo punonjës policie dhe u është përgjigjur se nuk kishte lekë, ndonëse me vete kishte pasur rreth 50 000 lekë. Personi e ka përsëritur kërkesën për para disa herë me ngulm, duke iu afruar edhe me trup fizikisht, por në këto momente personi tjetër që ndodhej në timon i ka kërkuar të largohej. Pasi kanë lënë automjetin të largohej, kallëzuesi ka vënë re nëpërmjet pasqyrës se këta shtetas kanë ndaluar një kamion tjetër”, thuhej në vendimin e Gjykatës.
Pas ndalimit si të dyshuar për ngjarjen, dy të afërmit Topalli mohuan akuzën, por gjatë gjykimit ata u shprehën të penduar dhe kërkuan mëshirë para trupit gjykues./Marrë nga Panorama/
