Një i afërm i një prej të burgosurve që ndodhet në burgun e Shënkollit akuzon policinë e burgut se i ka lënë brenda të dënuarit.
I afërmi, tha se punonjësi i sigurisë ishte larguar me vrap në kohën kur ra zjarri dhe kishte mbyllur të gjitha dyert me kyç, duke lënë brenda të burgosurit, të cilët po asfiksoheshin.
“I afërmi im është në gjendje të mirë. Bombolat aty janë për kafe. Polici ka mbyllur dyert dhe është larguar nga ambienti i burgut. Dhe të burgosurit janë lënë mes zjarrit të asfiksuar, ndërsa disa të tjerë ulërinin nga dritarja, disa u hodhën nga kati i tretë, ishin të tmerruar. Ka qenë një shkëndije elektrike ajo që ka shkaktuar zjarrin. Nuk ka pasur shpërthim me bombol. Një person ka humbur jetën, dhe 3-4 persona janë të gjendje të rëndë.”, tha dëshmitari, duke shtuar se të gjithë shkuan me vonesë në vendngjarje, raporton Balkanweb.
Nga zjarri humbi jetën 25-vjecari Flamur Sulja dhe 2 persona të tjerë janë në gjendje të rëndë.
