Seanca ku do të diskutohej për 7 ligjet për cështjen e Reformës në Drejtësi nuk do të mlidhet para datës 11 gusht. Këtë lajm e bëri të ditur kreu i Kuvendi të Shqipërisë, Ilir Meta.
Pas një takimi të gjatë me ambasadoren gjermane në vendin tonë, në ambientet e Hotel “Rogner”, Meta tha duke qeshur se për të, kreun e komisionit të reformës, Fatmir Xhafajn dhe nënkryetarin nga opozita, Oerd Bylykbashi do të ketë pushime dimërore dhe jo verore.
“Duket se unë, Xhafa dhe Bylykbashi do të bëjmë pushime dimërore. Pas bisedimeve me konsensus do ju njoftojmë në dy ditët e ardhshme se kur do të shkojmë drejt një seance të suksesshme” tha Meta. Sipas tij, dy ditët që vijnë, palët do të jenë më të qartë që të vazhdojnë rrugën e nisur për të respektuar afatet dhe rekomandimet. Pyetur për mbledhjen e komisionit për ligjet e vetingut, Meta u përgjigj: “Jam i informuar për përgatitjen, komisioni do mblidhet në kohën e duhur, nuk është thjesht të mbledhim komisionin, por të kemi axhendë të qartë nga komisioni deri te mbledhja e seancës”.
