Megjithëse në pikun e sezonit veror, qyteti i Sarandës, destinacion për shumë turistë e pushues vuan mungesën e ujit të pijshëm. Më problematike situata paraqitet në lagjen “Kodër” ku sipas banorëve uji vjen vetëm 30 minuta një herë në ditë. Qytetarët thonë për Boldnews.al se paguajnë rregullisht faturat por ujin e blejnë nga botet.
“Jemi në lagjen më turistike të Sarandës, vija e parë e qytetit dhe më e populluar dhe njëherë në ditë na vjen uji, vetëm 30 minuta. Situata është e papërballueshme dhe skandaloze. Nga njëra anë paguajmë faturat e ujësjellësit dhe nga ana tjetër paguajmë ujin që e blejmë nga botet. Ujësjellësi nuk jep shpjegime. Ne duam zgjidhje”, shprehen banorët.
Ata thonë se me këtë problem përballet gjithë qyteti por më shumë kjo lagje dhe se ndodh çdo verë.
