Me një ceremoni parakalimi të mysafirëve dhe artistëve filloi festivali i tretë i teatrove “Ktu Fest” në Strugë, që sivjet ka karakter ndërkombëtar, me pjesëmarrjen e një trupe teatrore nga qyteti Cluj i Rumanisë.
Filloi festivali, filloi edhe festa e artistëve shqiptar dhe të tjerë në Strugë. Së paku kështu mund të sublimohej e gjithë ajo që u pa dhe u përjetua para dhe pas hapjes solemne minispektakolare të edicionit të tretë të festivalit të teatrove “K’tu fest”, ku pas ceremonisë së hapjes, para një auditoriumi tepër meritor të artit shqiptar, ku i pranishëm ishte edhe kryetari i komunës së Strugës, Ziadin Sela, përfaqësues të jetës shoqërore e kulturore shqiptare, si dhe personalitete dhe figurave më emblematike dhe sinjifikative të skenës teatrore dhe të kinematografisë shqiptare: Tinka Kurti, Yllka Mujo, Zamira Kita, Xhevat Limani, Ahmet Jakupi, Drita Kaba-Karaga, Adem Karaga, dueti i filmit me metrazh të shkurtër që konkuroi për “Oscar” Lum Veseli e Andi Bajgora si dhe shumë e shumë të tjerë.
Pas hapjes së Festivalit nga regjisorja Olsa Poshka dhe trupës teatrore të fëmijëve, minutat në vazhdim të natës së parë të festivalit të teatrove “K’tu Fest” ishin të rezervuara për filmin me metrazh të shkurtër i nominuar për “Oscar” – “Shok”.
Në këtë film luajnë: Lum Veseli, Andi Bajgora, Melihate Qena, Aurita Agushi, Eni Cani, Armond Morina, Eshref Durmishi, Sunaj Raça, Luan Kryeziu, Astrit Kabashi, Xhevdet Jashari, Kushtrim Sheremeti, Fisnik Ademi, Besnik Krapi etj, me asistente të regjisë, regjisorja kosovare Blerta Basholli ndërsa drejtor i fotografisë është skocezi Philip Robertson. Filmi është i mbështetur nga Qendra Kinematografike e Kosovës dhe është prodhim i shtëpisë filmike “Eagle Eye Films Kosova”, me producent Eshref Durmishi dhe “Eagle Eye Media Ltd” me producent Harvey Ascott.
Festivali ndan një çmim për arritjet dhe realizimet artistike ndaj festivali i sivjetëm “K’tu Fest” ndau këtë çmim të veçantë, një byzylik floriri, për merita në afirmimin e kulturës shqiptare, që këtë vit me plot meritë i takoi filmit “Shok”. Byzylykun e artë “Ars Gratia Artis” nga dora e kryetarit të komunës Ziadin Sela e pranoi dueti i filmit “Shok” Lumi Veseli dhe Andi Bajgora.
Sot, në ditët e dytë të festivalit, në program është shfaqja e teatrit mysafir nga qyteti Cluj i Rumanisë. Kjo shfaqe nga Rumania është e Kompanisë Teatrore ”Teatru Acum” Cluj, që do do të paraqitet me pjesën ” Femra…Si një fushë beteje”, në regji të Laszlo Vadas.
