Ish-drejtori i Uzinës së Lëndëve Plasëse Mjekës Elbasan është ndaluar nga policia e këtij qyteti për akuzën Shpërdorim detyre” dhe “Shkelje të barazisë së pjesmarrësve në tendera apo ankande publike”.
Policia njoftoi sot, 27 korrik 2016, arrestimin e Daniel Karanxhës 64 vjeç, banues në Elbasan.
“Ky shtetas, u ndalua nga efektivat e policisë, pasi Gjykata e Rrethit Gjykësor Elbasan, me vendim penal, ka caktuar masën e sigurisë “ Arrest me burg” për veprën penale ”Shpërdorim detyre” dhe “Shkelje të barazisë së pjesmarrësve në tendera apo ankande publike” parashikuar nga nenet 248 dhe 258 të Kodit Penal”.
Disa ditë më parë (14 korrik) katër zyrtarë të tjerë të po kësaj Uzine përfunduan në prangat e policisë, të akuzuar po për këtë vepër penale, ndërsa ish-drejtori i arrestuar sot ishte shpallur në kërkim.
Ata akuzohen se kanë shpërdoruar detyrën për zhvillimin e tenderit për “Shitje skrapi dhe lëndëve plasëse TNT”, procedurat e tenderimit “Koncerti i trashëgimisë kulturore shqiptare” si dhe sponsorizime të tjera të kryera nga Uzina Lëndëve Plasëse Mjekës.
