Kreu i Komisionit të Posacëm për Reformën në Drejtësi, Fatmir Xhafaj ka pasur një përplasje me deputeten socialiste, Vasilika Hysi për Kryeprokurorin e ri. Hysi ka kërkuar sqarime se si do të verifikohet nëse ai ka qenë pjesëtar i sigurimit pa hapur dosjet e komunizmit?!
Pas miratimit të ndryshimeve kushtetuese me konsensus, parlamenti ka shtyrë për në shtator shqyrtimin e 7 ligjeve që mundësojnë zbatimin e Reformës në Drejtësi. Por, kreu i Kuvendit, Ilir Meta foli për një ‘rikthim’ të parlamentit. Ai tha sot në nje intervistë për “Zërin e Amerikës” se Parlamenti do të mblidhet në cdo moment që do të jetë e nevojshme për të miratuar këto shtatë ligje, madje që prej së enjtes.
DEBATI
Edhe pse opozita nuk ka qenë e pranishme gjatë shqyrtimit të nismave, deputetët e PS-së janë përfshirë në debate për emërimin e Prokurorit të ri të Përgjithshëm gjatë mbledhjeve pa media të Komisionit të Reformës.
Deputetja e PS-së, Vasilika Hysi, gjatë shqyrtimit të projektligjit “Për funksionimin e Prokurorisë së Përgjithshme”, ka ngritur si shqetësim faktin se për kandidatin për kryeprokuror nuk mund të bëhet verifikimi nëse ka qenë apo është bashkëpunëtor i Sigurimit të Shtetit apo i agjenturave të ndryshme.
“Ju keni parashikuar, me shumë të drejtë, që Prokurori i Përgjithshëm nuk duhet të ketë qenë bashkëpunëtor i Sigurimit të Shtetit. Në ligjin ‘Për qeverisjen e pushtetit gjyqësor’ ju keni vënë afate qoftë për Prokurorin e Përgjithshëm, qoftë edhe për anëtarët e tjerë, për të cilët verifikimi duhet bërë brenda shtatë ditëve. Në momentin kur ne nuk i kemi hapur ende dosjet, si mund të arrihet verifikimi nëse personi ka qenë punonjës i organeve të ishSigurimit të Shtetit, bashkëpunëtor i Sigurimit të Shtetit ose i favorizuar prej tij?”, ka thënë Hysi, shkruan Panorama.
Por kryetari i Komisionit ka ironizuar me Hysin, duke thënë se dosjet mund të mos hapen asnjëherë. “Kur të hapen dosjet, do të bëjmë Prokuror të Përgjithshëm në Shqipëri! Ja nuk hapen asnjëherë dosjet, si do të bëjmë? Do t’u drejtohen autoriteteve që kanë sot akses mbi to dhe do të kthejnë përgjigje. Në qoftë se ato kthejnë përgjigje: ‘Është në rregull’. Më kupton? Se nuk do të presim ne sa të bëhet autoriteti. Kur të bëhet… se nuk bëhet dot, zonja Hysi”, është shprehur Xhafaj.
