Një 27-vjeçar sirian ka hedhur veten në erë, pranë një koncerti në Ansbach, në Gjermani. Mediat në Gjermani bëjnë të ditur se atentatori ka mbetur i vdekur, ndërsa 12 persona janë plagosur si pasojë e shpërthimit. Mësohet se siriani vuante nga probleme psikologjike, pasi i ishte refuzuar kërkesa për azil.
Ministri bavarez i Punëve të Brendshme, Joachim Herrmann bëri të ditur se 27-vjeçari kishte si qëllim të kryente atentatin brenda koncertit ku ishin mbledhur rreth 2500 persona, por nuk ishte lejuar të futej pasi nuk kishte biletë dhe ka shpërthyer pranë një lokali, duke shkaktuar 12 të plagosur. Mësohet se 27-vjeçari e kishte futur lëndën shpërthyese në një çantë shpine.
Ministri Herrmann konfirmoi se sirianit i ishte refuzuar disa herë kërkesa për azil, por ai vijonte të jetonte në Gjermani. Në të kaluarën siriani kishte tentuar disa herë vetëvrasjen dhe ishte kuruar në psikiatri për probleme mendore.
Gjermania nuk po arrin të zgjohet nga makthi që e ka përfshirë që prej të premtes mbrëma ku një adoleshent qëlloi me armë në një qendër tregtare në Mynih, duke shkaktuar 9 viktima.
