Sot është seanca e fundit parlamentare ku pritet të miratohen një sërë ligjesh të rëndësishme që lidhen me reformën në drejtësi. Me shumicë votash, pritet të mriatohet zgjatja deri në dhjetor e mandatit të Komisionit të Posaçëm për Reformën në Drejtësi, që duhej ta mbyllte punën në 27 korrik. Kuvendi do t’i shtojë kohëzgjatjen deri në dhjetor komisionit, i cili duhet të vijojë punën për 7 projektligjet që bëjnë të zbatueshme reformën në drejtësi.
Rendi i ditës i seancës ka 8 pika, mes të cilave dy marrëveshje koncesionare, ndryshimet në Kodin Penal dhe ligjin për rivlerësimin e pasurisë.
Kështu: Projektligji “Për rivlerësimin e gjyqtarëve dhe prokurorëve në Republikën e Shqipërisë”; projektligji “Për organizimin dhe funksionimin e Prokurorisë në Republikën e Shqipërisë”; projektligji “Për organet e qeverisjes të sistemit të drejtësisë në Republikën e Shqipërisë”; projektligji “Për statusin e gjyqtarëve dhe prokurorëve në Republikën e Shqipërisë”; projektligji “Për organizimin e pushtetit gjyqësor në Republikën e Shqipërisë”; projektligji “Për disa shtesa dhe ndryshime në ligjin nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”; projektligji “Për organizimin dhe funksionimin e institucioneve në luftën kundër korrupsionit dhe krimit të organizuar”.
Në komisionin e posaçëm, që pritet tashmë të vijojë punën me përmbajtjen e plotë opozita do rikthehet në vendet e saj, për të bërë sugjerimet përkatëse. Kjo pasi ekspertët e PD-së po punojnë prej kohësh për një paketë sugjerimesh përkatëse për ligjet e emergjencës. Me miratimin e projektligjeve të fundit për këtë sezon, deputetët dhe ministrat marrin pushimet për t’u rikthyer në sesionin e 7-të të Kuvendit, që nis të hënën e parë të shtatorit, në datën 5.
