Eshtë zyrtare. Odise Roshi ka firmosur kontratën 3-vjeçare me Terek Grozny, duke mbyllur transferimin e tij në kampionatin rus. Anësori i kombëtares kuqezi ka pozuar edhe me fanellën e skuadrës së re të Premier Ligës Ruse, në krah të shokut të pandarë, Bekim Balajt, dhe dy menaxherëve, Ardian Aliaj e Shkumbin Qormemeti.
Ka qenë pikërisht ky i fundit që ka negociuar dhe udhëhequr me sukses këtë tratativë, duke i bërë sërish bashkë, si te Rijeka, dy kuqezinjtë. Ai ka njoftuar se “Odise Roshi është lojtari më i ri i Terek Grozny”. Mësohet se Rijeka, që nuk e kishte në planin e vet mesfushorin shqiptar, që nuk ia dha hapësira aktivizimi edhe sezonin e kaluar, ka përfituar 500 mijë euro me këtë rast, një shumë jo e vogël, edhe pse për një lojtar të kombëtares nuk hyn dhe aq në sy…
Më herët, kur ishte i grumbulluar me kombëtaren për finalet e “Euro 2016”, u bë transferimi i Bekim Balajt në klubin rus. Në gjurmët e tij ishte vendosur edhe Odise Roshi, që sot ka zyrtarizuar skuadrën e tij të re, ku shpreson të ketë aktivizim të rregullt dhe të mos ndeshë në pengesat që s’i superoi dot si duhet në Gjermani dhe Kroaci. Kombëtarja ka shumë nevojë për të dhe Balajn, ndaj kjo lëvizje e të dyve është një lajm i mirë edhe për De Biazin.
