Mbledhja e Konferencës së Kryetarëve po zhvillohet ende edhe pse me dyer të mbyllura tashmë pasi është larguar media. Duket se palët politike janë kthyer në pikën zero për sa i përket negociatave. Marrëveshja konsensuale e arritur gjatë paradites së djeshme, u zhbë gjatë mbrëmjes.
Partia Demokratike kërkonte të njëjtën formulë përzgjedhëse për vetingun, ashtu edhe për Këshillin e Lartë Gjyqësor e atij të Prokurorisë. Kjo kërkesë sipas socialistëve, është e re dhe e padakordësuar më parë. Këtu qëndrimet e palëve u ndan dhe reforma në drejtësi hyri sërish në ngërç.
Kur na ndan vetëm 1 orë nga fillimi i seancës nuk dihet ende nëse me forcën e kartonëve jeshilë do arrihet të përmbyset sistemi problematik i drejtësisë.
Nga ana tjetër Ambasadori i Shteteve të Bashkuara të Amerikës, Doland Lu dhe ajo e Bashkimit Europian, Romana Vlahutin kanë mbërritur në Kuvendin e Shqipërisë, ndërsa pritet të ndjekin nga afër seancën e sotme plenare ku do të diskutohet reforma në drejtësi.
Përsa i përket qëndrimit amerikan, Ambasada Amerikane me anë të një deklarate tha se pretendimet e PD-së janë të reja dhe akuzoi lidershipin e kësaj force se po përpiqet të bllokojë reformën. Sakaq edhe raportuesi për Shqipërinë në parlamentin europian, Knut Fleckenstein, pasi kishte përshëndetur pasdite, arritjen e marrëveshjes mes palëve, në oret e vona te mbrëmjes u shpreh “i tronditur” nga zhvillimet e fundit. “Probleme të reja nga Shqipëria? Nuk mund ta besoj! Jam me të vërtetë i mërzitur. Do të presim votimin e nesërm? Pastaj do të shohim. Më vjen keq!”
