Nga Boldnews.al
Reforma në Drejtësi në Shqipëri po sjell disa deformime politike që shtrihen përtej faktorit politik vendas. Dyshja e ambasadorëve, Donald Lu dhe Romana Vlahutin, të cilët janë promotorët e ndryshimeve kushtetuese duket se janë bërë pjesë e rrëmujës se kulisave partiakë ballkanas.
Deri para pak ditësh, çifti i diplomatëve fliste për një vijë të kuqe, të cilën politika shqiptare, duke iu referuar qartësisht opozitës, nuk duhet ta kalonte.
Por, kjo “vizë e kuqe” e vendosur nga Lu-Vlahutin erdhi duke u zbardhur fillimisht nga nënsekretarja Viktoria Nuland e më tej nga Komisioni Johanes Han. Dhe efekti i saj i zbardhjes së vizës, mesa duket ka përfshirë edhe diplomatët më të fuqishëm në Tiranë.
Qëndrimet e të dyve, edhe në orët e fundit, janë të ndryshme nga ato që përcillen në Shqipëri prej kancelarive kryesore të Uashingtonit dhe Brukselit. Kjo situatë prodhon dilemën, nëse Donald Lu dhe Romana Vlahutin përfaqëësojnë realisht zyrat e tyre qëndrore.
Pak ditë më parë, Viktora Nuland prezantoi në Tiranë një “variant hibrid” për Reformën në Drejtësi, me synimin për të bindur palët politike që të arrinin një marrëveshje të rëndësishme. Ky propozim “hibrid” u përshëndet nga të gjitha palët, përfshirë edhe ambasadorët. Por, ajo që lehtësisht konstatohej ishte fakti që “hibridi” rrëzonte projektin e mbrojtur fuqishëm nga ambasadori amerikan, Donald Lu, i shoqëruar nga homologia e Bashkimit Europian, Romana Vlahutin dhe me përuljen absolute të kryeministrit Edi Rama.
Media e perifrazoi qëndrimin e Nuland në Tiranë si një “pushim nga detyra” për ambasadorin Lu. Ky i fundit ka mbështetur fuqishëm projektin e rrëzuar nga Nuland dhe, megjithatë, nuk shprehu asnjë pendesë për presionin e hapur me “vija të kuqe” ndaj opozitës. Përkundrazi, megjithëse e konstatoi se projekti i tij ra, Lu u ngut që të merrte meritat e një zgjidhje që nuk ishte aspak e tij.
Edhe zyrat kryesore të Brukselit u përfshinë në debatin politik shqiptar, me qëllim të gjejnë një zgjidhje të gjithëpranuar. Të mërkurën, Komisioneri i Zgjerimit, Johanes Hahn, rrëzoi nga ana e tij projektin Lu-Vlahutin lidhur me rolin ndërkombëtarëve në procesin e kontrollit të gjyqtarëve dhe prokurorëve. Ambasadorja Vlahutin, në krah të kolegut Lu, kanë mbështetur fuqishëm rolin kontrollues të ekspertëve ndërkombëtarë në institucionet e reja të drejtësisë. Pra, edhe Hahn, në formë metaforike, “ka pushuar nga detyra” Romana Vlahutin. Por e njëjta, ashtu si edhe ambasadori Lu, nuk e kanë pranuar dështimin e tyre. Dyshja e ambasadorëve vijon të godasë opozitën, ndërkohë që projekti i tyre u rrëzua nga Viktoria Nuland dhe Johanes Hahn.
Dhe në këtë mënyrë, kakofonisë politike shqiptare, i shtohet edhe “rrëmuja diplomatike”. Donald Lu dhe Romana Vlahutin flasin në emër të Uashingtonit dhe Brukselit. Por, siç është njohur publiku shqiptar, Uashingtoni nëpërmjet Viktoria Nuland dhe Brukseli, nëpërmjet Johanes Hahn, kanë folur ndryshe nga dyshja Lu-Vlahutin. Pikëpyetja e fundit që shtrohet është nëse çifti i diplomatëve në Tiranë përfaqëson linjën zyrtare të strukturave të tyre apo është duke ndjekur një axhendë të ndryshme, e cila, ndoshta rastësisht, përkon me qëndrimin e njërës palë politike-kryeministrit Edi Rama.
