Mesfushori francez, Paul Pogba sezonin e ardhshëm do të luajë në Premier League ku do të veshë fanellën e Manchester United.
Lajmi ende nuk është zyrtarizuar nga lojtari apo klubet por sipas burimeve të ‘Corriere Dello Sport’, ‘La Gazzetta Dello Sport’ dhe ‘The Sun’, Juventus më në fund ka pranuar 125 milionë euro plus 17 milionë euro në bazë të performancës së lojtarit, shkruan Syri.net.
“Pogba ka zgjedhur Mourinhon. Arrihet marrëveshja për 125 milionë euro”, është titulli i parë i të përditshmjes italiane ‘Corriere Dello Sport’.
Edhe e përditshmja britanike ‘The Sun’ shkruan se tashmë është arritur kjo marrëveshje transferimi dhe Pogba mund të quhet i sigurt lojtar i Manchester United.
Është vetëm çështje orësh zyrtarizimi pasi këtë e ka konfirmuar edhe agjeni i lojtarit Mino Raiola i cili nga Manchesteri ka theksuar se lojtari e ka mbyllur ciklin në Torino.
Pogba do nënshkruajë një kontratë 5-vjeçare me United ku do të përfitojë 12 milionë euro në sezon.
Pogba kthehet në transfertën më të shtrenjtë në historinë e futbollit, pasi ‘Djajtë e Kuq’ do të dredhin në arkat e kampionëve të Italisë plot 125 milionë euro, plus 17 milionë të tjera në rast të paraqitjes pozitive të lojtarit.
Pas Kampionatit Europian, Pogba po kalon disa ditë pushimi në Miam të SHBA, ku është parë nën shoqërinë e sulmuesit të Evertonit, Romelu Lukaku.
Pas katër vitesh, 4 tituj të ligës, dy kupa italiane dhe 3 superkupa më në fund Paul Pogba i jep drejtim të ardhmes ku pritet të nënshkruajë një kontratë 5-vjeçare në ‘Old Trafford’.
