Takimi prej 150 minuta ka përfunduar ditën e sotme për tu pasuar me një tjetër takim mes tre negociatorëve që do të vendosen nga palët disa ditë më vonë.
Është ky lajmi i fundit që vjen nga kryetari i opozitës, Lulzim Basha i cili doli pak minuta më parë nga takimi Rama -Basha -Meta, duke dhënë dhe një prononcim të shkurtër para mediave.
Basha duke vlerësuar takimin si konstruktiv tha se ka propozuar zgjidhje për të mbyllur me sukses reformën në drejtësi. Ai tha se negociatori i Partisë Demokratike do të jetë Oert Bylykbashi i cili do të ketë një takim edhe me 2 negociatorët e tjerë të partive kryesore.
Kreu i opozitës tha se negocimi do të bëhet mbi propozimin hibrid të SHBA/BEsë, të zbatuar sipas Komisionit të Venecias.
Mësohet se negociator për LSI -në do të jetë Ylli Manjani ndërsa për PS-në do të jetë Engjëll Agaci.
Ndërkohë në orën 19:00 kryeministri Rama ka njoftuar për një konferencë shtypi.
