Kryeministri Edi Rama pranon ftesën e kryeparlamentarit Ilir Meta për t’u ulur në një tryezë të përbashkët të hënën për të gjetur konsensusin për reformën në drejtësi. Në një status në facebook, Rama thotë se çdo diskutim sy më sy për reformën në drejtësi deri më 21 korrik ia vlen.
“I gatshëm të ulem në çdo moment në tryezën e propozuar nga I.Meta! Çdo diskutim sy më sy për Reformën në Drejtësi deri në 21 korrik ia vlen”, shkruan Rama.
Kreu i Kuvendit Meta propozoi sot që kryeministri Edi Rama, kreu i opozitës Lulzim Basha, ai vetë dhe 2 ambasadorët të mbyllen bashkë në ambientet e Kuvendit, derisa të gjejnë një zgjidhje për reformën.
Sipas Metës, ose duhet që të gjejnë zgjidhje; ose sipas tij duhet të pestë të largohen nga politika dhe diplomacia.
Pas deklaratës së tij, ambasadorët Lu dhe Vlahutin u përgjigjën pozitivisht ftesës, por me kushtin e vetëm që të diskutohej vetëm propozimi hibrid i Nuland. Tashmë pritet vetëm përgjigjja e Kreut të PD-së, Lulzim Basha.
