Nuk ka më dyshime! Rikthimi i mesfushorit Mario Götze te Dortmundi është çështje e mbyllur. Ky është lajmi i fundit i servirur nga revista gjermane “Sport Bild” në versionin e saj “online”. Kostoja e transferimit të 24-vjeçarit nga Bayerni te Borussia është rreth 28 milionë euro (shifra mund të rritet, nëse lojtari performon mirë).
Kontrata e tij te verdhezinjtë do të jetë deri në vitin 2021. Vetëm pak orë më parë, trajneri Carlo Ancelotti në konferencën e tij për shtyp deklaroi: “Për Marion nuk kemi informacione të reja, ai është lojtar i Bayernit.” Epo, tani jo më! Dyshja “Götzeus” (Mario Götze & Marco Reus) do të jetë sërish më emocionuesja e Bundesligës Kampioni i botës u transferua nga Dortmundi në Mynih në vitin 2013 për 37 milionë euro. Nga atëherë, ylli i mesfushës nuk arriti të rrisë nivelin e tij, gjersa nën drejtimin e trajnerit Pep Guardiola gjeti shumë pak minuta. Klubi në muajt e fundit ia bëri të qartë atij se duhet të gjejë një skuadër të re, ku i garantohet një vend titullari.
Mario Götze ka miqësi të madhe me André Schürrlen. Pse jo, ai i dha asistin fantastik në Botërorin 2014! Me kalimin e tij në Dortmund, Götze pritet të bashkohet jo vetëm me ish-shokun e tij të skuadrës, Marco Reus, por edhe me kolegun e tij te kombëtarja dhe shokun e ngushtë në jetën e përditshme, André Schürrle, me të cilin ai aktualisht po pushon në Shtetet e Bashkuara të Amerikës. Pra, imagjinoni një treshe ofensive Reus-Götze-Schürrle! Të mjaftueshëm për magji, apo jo?
