Ministri i Transportit dhe Infrastrukturës Edmond Haxhinasto, morri pjesë në prezantimin final të Strategjisë Kombëtare të Transportit, nga ku e vlerësoi si një moment shumë të rëndësishëm në politik-bërjen në fushën e transportit, e cila, sipas ministrit, do të pajisë këtë Ministri me një dokument reference në politikat për zhvillimin e infrastrukturës dhe për dhënien e shërbimeve cilësore të transportit.
Qëllimi vijoi Haxhinasto, është që edhe ky sektor i rëndësishëm për ekonominë dhe për zhvillimin e vendit të integrohet me ritme më të shpejta në Bashkimin Evropian. E pranishme në këtë aktivitet ishte edhe Ambasadorja e Delegacionit të Bashkimit Europian, zonja Romana Vlahutin.
Duke folur për Procesin e Berlinit, Ministri Haxhinasto e cilësoi këtë Strategji në përputhje me qëllimet e këtij procesi dhe u ndal tek Samiti i 4 Korrikut në Paris, ku u arritën edhe produkte konkrete përsa i takon infrastrukturës hekurudhore në vendin tonë, në miratimin e projektit të rëndësishëm të rehabilitimit të infrastrukturës hekurudhore Tiranë-Rinas-Durrës. Në këtë Samit, Bashkimi Evropian miratoi grantin prej 35 ml eurosh, si pjesë e zbatimit të projektit prej 82 ml euro, që do të sjelli një situatë krejtësisht tjetër në lidhjen e zemrës ekonomike dhe administrative të vendit, që është zona Tiranë-Durrës.
Një nga objektivat kryesor të kësaj strategjie do të jetë optimizimi i “Rrjetit Gjithëpërfshirës Kombëtar”, ku bëjnë pjesë segmentet kryesore të transportit në vendin tonë, si edhe qëndrueshmëria e këtij sistemi transporti, nëpërmjet mirëmbajtjes së duhur të tij, për të qenë në përputhje me zhvillimin ekonomik dhe të ketë edhe ekonominë pozitive të tij të brëndshme. Objektivi tjetër do të jetë integrimi i sistemit tonë të transportit me rrjetin rajonal si dhe me rrjetin Evropian, një vazhdimësi kjo e korridoreve të Evropiane.
Haxhinasto tha se strategjia ka marrë parasysh zgjidhjen e sfidave që ka sistemi ynë i transportit:
“Duke filluar me bazën ligjore përkatëse, duke vazhduar me një lidhje organike dhe një reflektim të kërkesës së sotme dhe të ardhshme përsa i takon zhvillimit ekonomik, si një sektor jo vetëm që gjeneron vlerë, por i shërben kësaj ekonomie për të realizuar rritjen dhe zhvillimin e saj”.
Në fjalën e tij, Ministri u ndal gjithashtu tek cilësia e shërbimit të cilën e konsideroi një prioritet strategjik të kësaj strategjie, dhe si shumë të rëndësishme është tërësia e masave që integrojnë transportin jo vetëm në aspektin fizik por edhe masat buta, për të liberalizuar tregun.
“Duhet të realizojmë disa sfida, liberalizimin e tregut, uljen e kostove në kalimet kufitare që në rajon janë 5 herë më të mëdha së ne bashkimin Evropian. Masat e buta janë themelore për zhvillimin e gjithë sistemit të transportit dhe si të tilla konceptohen nga Ministria. Në pak kohë kemi arritje të qarta, që po forcojnë marrëdhëniet mes vendeve të rajonit, siç është sistemi “One Stop Shop” në kufi, që lejon kalimin e kufirit vetëm me një ndalesë”.
Në planifikimin e investimeve është përdorur metoda e priotarizimit të projekteve infrastrukturore. Ajo i krijon mundësi reale investitorëve privatë për të konsideruar investime serioze në infrastrukturën e vendit, duke pasur një dokument vlerësues të të gjithë projekteve me interes kombëtar dhe rajonal, të vlerësuar sipas metodologjive Evropiane.
Haxhinasto u ndal tek sfida kryesore për zbatimin e kësaj strategjie, që është edhe akomodimi në buxhetin afatmesëm të kostove të zbatimit të hapave të nevojshme të parashtruara në Strategji.
“Ka ardhur momenti që strategjia duhet të jetë e vetmja pikë reference, me qëllim që të bëjmë dhe ne planifikimin buxhetor, duke i dhënë infrastrukturës peshën e duhur specifike që ka qoftë në rritjen ekonomike qoftë në detyrimet e tjera në kuadër të detyrimeve ndërkombëtare që kemi”.
