Nga Boldnews.al
Deputeti socialist njëherësh kryetari i Komisionit të Ekonomisë, Erion Braçe kërkon të tërheq sa më shumë vëmendje me ato që thotë, qoftë në emisione televizive apo rrjetet sociale. Dhe për ta bërë këtë përdor jo pak herë portalin e lajmeve Skandal.al, të cilën e disponon vet ai.
Sëfundmi, Braçe ka zbuluar edhe një zhanër tjetër të gazetarisë, atë të autolajmit. E thënë ndryshe, deputeti socialist i ka bërë vehtes së tij një lajm. Teksa ishte i ftuar në emisionin Zululand në Tema TV përballë gazetarit Mustafa Nano, Braçe foli për reformën në drejtësi ku aludoi se deputetë të mazhorancës nuk e duan. Deputeti socialist foli edhe për qëndrimet që ai do të mbajë në seacën parlamentare nëse nuk respektohen rregullat.
Pra, me këto deklarata të forta të lëshuara në Tema TV, Braçe bëri lajmin dhe e publikoi në portalin personal të tij, Skandal.al. Si për ti vënë qershinë sipër autolajmit, Braçe vendos edhe videon ku ishte i ftuar në emisionin Zululand.
Nuk është hera e parë që Braçe e bën një gjë të tillë. Po t’i hedhësh një sy statuseve të tij, shikon që pothuajse të gjitha janë lajme në portalin Skandal.al. Madje, hidhen aq shpejt si lajme saqë nuk përpunohen fare duke treguar një stil amatoresk të të shkruarit në media.
Boldnews.al zbuloi e para që portali Skandal.al është i deputetit socialist Erion Braçe, pavarësisht se ky e mohoi me një status të bërë në facebook.
