Partia Demokratike ka reaguar për ngjarjen e rëndë në Maqedoni, ku një 4-vjeçar shqiptar u shtyp me makinë nga një maqedonas. PD kërkon që drejtësia të veprojë që ngjarje të tilla të mos përsëriten.
“Partia Demokratike dënon me forcë ngjarjen e rëndë në Kumanovë të Maqedonisë, ku një qytetar ka përplasur me paramendim me makinë një familje shqiptare atje ku si pasojë mbeti i vdekur Almiri 4-vjeçar. Ky është një krim i shëmtuar çnjerëzor, dhe Partia Demokratike gjendet sot pranë familjarëve të Almirit, të afërmve dhe miqve, duke shprehur ngushëllimet më të sinqerta”, deklaron PD.
“Ky krim që ka tronditur Maqedoninë e më gjerë, meriton të ndëshkohet nga drejtësia. Ligji duhet të funksionojë me ashpërsi, për të mos lejuar që ngjarje të tilla të përsëriten. Partia Demokratike pret dhe kërkon drejtësi, drejtësi shembullore që t’i shërbejë Maqedonisë dhe stabilitetit atje”, thekson PD.
Të shtunën nacionalisti maqedonas Bojan Iliç aksidentoi qëllimisht e makinë 4-vjeçarin Almir Aliu në Kumanovë pas një debati që pati me babain e tij në spital, pasi ai i kishte liruar radhën një të moshuari. Ngjarja tronditi jo pak shqiptarët në Maqedoni, ndërsa autori u arrestua. Vogëlushi ndërroi jetë në spital për shkak të plagëve.
