Partia Demokratike po përgatit një kallëzim penal për mashtrim dhe pastrim parash për kryeministrin Edi Rama, pas hetimit të FBI-së për 80 mijë dollarët e paguara nga shtetasi Bilal Shehu, për fushatën e presidentit amerikan.
Sipas PD-së këto para u paguan nga kryeministri shqiptar, për të mundësuar foton e Obamës me Ramën, pavarësisht se shteti amerikan nuk lejon përfshirjen e shtetasve të huaj në fushatat elektorale, shkruan Balkanweb.
Kreu i PD-së, Lulzim Basha akuzoi sot kryeministrin Edi Rama se ka kryer një krim në Shtetet e Bashkuara të Amerikës për foton me Obamën. Në një dalje publike para mediave, Basha theksoi se kryeministri ka dorovitur 80 mijë dollarë për Obamën.
“80 mijë dollarë ka paguar Edi Rama për një foto. 80 mijë dollarë për një mashtrim. 80 mijë dollarë për t’iu hedhur hi syve shqiptarëve. Në rrugën e tij drejt marrjes së pushtetit Edi Rama nuk u ndal para asgjëje, nuk ngurroi të thërrasë nën armë gjithfarë kriminelësh, e nuk kurseu askënd me gënjeshtrat e me mashtrimet e tij, madje as partnerin tonë strategjik, SHBA.”, tha Basha.
Kryeministri Edi Rama ka sqaruar sot lajmet mbi foton e tij me Presidentin amerikan Barack Obama dhe faktin se një shtetas shqiptar në SHBA po gjykohet mbi financimin e fushatës elektorale të kandidatit. Sipas Ramës, kjo foto po përdoret qëllimisht për propagandë, ndërsa mohon të ketë marrë pjesë në ndonjë organizimin elektoral të Presidentit Obama, apo të ketë kryer ndonjë pagesë, siç shkruajnë mediat.
“Bilal Shehu që sot po gjykohet në SHBA për çështjen në fjalë është pjesëtar i komunitetit shqiptar në New York dhe eshte takuar me delegacionin qe tone ne SHBA ne vitin 2012. Por ne menyre kategorike nuk ka patur asnje lloj veprimi financiar nga ana e Edi Rames per te realizuar fotografine e takimit me Presidentin Obama”, citon në një njoftim të Drejtorisë së Komunikimit të Qeverisë. bw
