Një ditë pas grabitjes spektakolare në Rinas ku 3 persona të armatosur dhe me maska arritën të merrnin një shumë të konsiderueshme parash të një banke të nivelit të dytë që do të niseshin drejt Austrisë, publikohet një skemë që risjell gjithë skenën e ngjarjes.
“NEWS24” ka ndërtuar skemën e grabitjes në 3D.
Ngjarja ndodhi pasditen e djeshme rreth orës 14:23 sipas orës së sistemit të kamerave të sigurisë së Aeroportit të Rinasit. Një person i veshur me jelek me ngjyrë portokalli me fasha fosforeshente, kapërcen portën e ndodhur në skajin veri-perëndimor të pistës, portë e cila përdoret vetëm për hyrje-daljen e mjeteve që furnizojnë me karburant avionët.
Ky person ka prerë drynin e derës dhe pasi ka hapur atë, në territorin e pistës futet një automjet tip ‘Mercedes Benz’ me ngjyre vishnje. Autorët janë futur me makine në vendqëndrimin e automjeteve të shërbimit dhe kanë kryer vjedhjen e parave që ndodheshin në makinën e blinduar të shoqërisë së sigurimit.
Në orën 14:27 ky automjet duket që del përsëri nga territori i aeroportit nga e njëjta portë, prej nga hyri. Rezulton se pas daljes nga porta, autorët janë larguar në drejtim të aksit rrugor Rinas – Fushë Krujë – Vorë.
Në orën 14:33, 10 minuta pas thyerjes së sigurisë së rrethimit të jashtëm të aeroportit, Salla Operative e DVK&M Tiranë njoftohet nga ODM (Operatori i Drejtimit dhe Menaxhimit të Aeroportit), se persona të armatosur kanë hyrë me automjet brenda territorit të pistës së avionëve dhe kanë kryer një grabitje.
Menjëherë me marrjen e njoftimit shërbimet e policisë janë vënë në ndjekje të autorëve duke konstatuar një automjet tip Mercedes Benz i cili po digjej.
