Ministrat e Jashtëm të 6 vëndeve themeluese të Bashkimit Europian janë mbledhur sot me urgjencë në Berlin për të diskutuar mbi rezultatin e Referendumit të sapombajtur në Britaninë e Madhe.
Qysh në ora 6 të mëngjesit Minsitri italian Paolo Gentiloni, Ministri francez Jean-Marc Ayrault, ministri hollandez Bert Koenders, ai belg Didier Reynders, ministri i Jashtëm i Luksemburgut Jean Asselborn, nën drejtimin e minstrit të Jashtëm gjerman Frank-Walter Steinmeier janë mbledhur për të diskutuar mbi cështjet e jashtme të politikës aktuale europiane. Tema kryesore e këtij takimi do të jetë garantimi i një tranzicioni sa më pak problematik të largimit të Britanisë së Madhe nga Bashkimi Europian.
Në një intervistë të dhënë sot për mediat italiane, Ministri i Jashtëm italian Gentiloni ka deklaruar se vendet themeluese të Bashkimit Europian do të kërkojnë nga Britania e Madhe të përshpejtojë procedurën që rregullon daljen e këtij vendi nga BE.
“Europa ka nevojë për stabilitet të tregut, për qartësi e forcë e përzgjatja e procedurave të divorcit të Britanisë së Madhe nga BE vetëm do të dëmonte”, është shprehur ai.
Ndërsa Ministri i Jashtëm i Gjermanisë, Steinmeier është shprehur se BE nuk duhet të kalojë në paralizë dhe se nuk duhet të futet në depresin nga Brexit.
Ndërkohë po mbi këtë temë, ditën e hënë në Berlin do të zhvillohet një takim tripalësh Gjermani-Francë-Itali ku do të marrin pjesë Kancelarja Merkel, Kryeminstri italian Renzi e Presidenti francez Hollande. Ky takim do t’i paraprijë samitit të jashtëzakonshëm të vendeve të BE që do të mbahet ditën e martë në Bruksel.
