Lojtarët e Kombëtares kthehen sot në vend, ndërsa për ta do të ketë një pritje heronjsh, madhështore. Që në aeroport ata do të priten nga kryeministri Edi Rama. Është planifikuar festë në shesh, rrugë të rezervuara vetëm për parakalimin e kuqezinjve, si dhe takime me zyrtarë të lartë shtetërorë. Kjo është axhenda që pritet të ndjekë Kombëtarja gjatë ditës së sotme.
Nisja e avionit çarter të Kombëtares do të bëhet rreth orës 14:00, në mesditën e sotme. E mbrëmshmja ka qenë nata e fundit e Shqipërisë në Europian dhe për lojtarët i fundit 24 orësh në grumbullim me Kombëtaren për këtë aventurë historike.
Pas barazimit të Portugalisë, Shqipëria është eliminuar përfundimisht dhe që nga ai moment kuqezinjtë kanë pësuar ulje të humorit dhe janë trishtuar që nuk u ka mjaftuar ajo fitore ndaj Rumanisë për të vijuar aventurën në Europian edhe pas fazës së grupeve. Udhëtimi është parashikuar që të zgjasë tri orë.
Nga nisja në Francë deri në mbërritjen në aeroportin e Rinasit mendohet që do të jenë tre orë udhëtim për kuqezinjtë. Pas mbërritjes në tokën e tyre, lojtarët kuqezi do të nisin më pas edhe “turin” e takimeve zyrtare që do t’u paraprijnë edhe festës së madhe në shesh.
Në Aeroportin e Rinasit është programuar një pritje zyrtare nga Kryeministri i vendit Edi Rama dhe krerët më të lartë të shtetit, por padyshim duhet të jenë aty për t’i uruar mirëseardhjen me një falënderim të madh për gjithë atë që na kanë dhuruar dhe përfaqësimin dinjitoz që i bënë kombit, të gjithë ata tifozë shqiptarë që kanë mundësi, për ta kthyer këtë rikthimin në shtëpi në një festë të madhe.
Më pas, autobusi i kuqezinjve do të niset drejt Tiranës dhe i gjithë rrugëtimi do të transmetohet LIVE.
Ndalesa e parë e tyre do të jetë Bashkia e Tiranës, ku ekipit kombëtar do t’i jepet çelësi i Bashkisë.
Në axhendë është parashikuar pritje edhe në ministrinë e Jashtme, ku i gjithë stafi do të pajiset me pasaporta diplomatike, një premtim ky i kryeministrit Edi Rama pas fitores me Rumaninë.
Edhe kreu i Qeverisë ka parashikuar pritje për futbollistët në Kryeministri dhe ndalesa e fundit do të jetë tek ‘Fan Zone’ në sheshin Nënë Tereza, ku do të takohen me tifozët.
Ja axhenda që do të ndjekë ekipi kombëtar:
1- Në 15:30 ekipi kombëtar mbërrin në aeroportin e Rinasit
2- Nisja nga aeroporti drejt Tiranës
3- Ceremonia e dhënies së çelësit në Bashkinë e Tiranës
4- Ministria e Jashtme, procedurat për pasaporta diplomatike
5- Kryeministri, pritja në COD me kreun e Qeverisë
6- ‘Fan Zone’, stacioni i fundit i ceremonialit për kombëtaren
