E ardhmja e Neymar te Barcelona është bërë objekt dyshimesh teksa shtypi spanjoll shkruan se ka vetëm 50% mundësi që ai të rinovojë kontratën. “El Mundo Deportivo”, gazetë me seli në Barcelonë, ka bërë të ditur se kampionët e Spanjës janë alarmuar nga fakti që nuk janë të sigurt se do të mbajnë brazilianin në ekip. Mësohet se Paris Saint-Germain i ka ofruar 24-vjeçarit një pagë stratosferike prej 50 milionë eurosh në sezon.
Neymar ka një kontratë me Barcelonën deri në vitin 2018 në bazë të marrëveshjes pesë vjeçare që ai firmosi kur u largua nga Santos në vitin 2013. Pronari i PSG, Nasser Al-Khelaifi, mësohet t’i ketë thënë disa miqve të tij se kampionët e Francës janë shumë pranë blerjes së Neymar. Raul Sanllehi, një nga drejtuesit e Barcelonës, ka udhëtuar menjëherë drejt Brazilit për të bindur lojtarin të qëndrojë në “Camp Nou”.
Ndërkohë, Gabriel Jesus, futbollisti i talentuar i Palmeiras është shumë pranë kalimit te Barcelona. Gazeta spanjolle “Sport” shkruan se katalanasit janë shumë pranë firmës me futbollistin që pritet të kushtojë 40 milionë euro. Sulmuesi, që ka shënuar 20 gola në 60 ndeshje të luajtura gjatë sezonit të kaluar, ka një kontratë deri në vitin 2019 me klubin e Palmerias.
